उत्तरी सिरियामा दुई विद्रोही समूहबीच परस्परमा भएको झडपका क्रममा कम्तिमा १९ जनाको मृत्यु भएको सिरियामा जारी द्वन्द्वलाई निरीक्षण गरिरहेका मानवअधिकारीवादी संस्थाहरूले जनाएका छन् ।
सिरियाको पश्चिमी प्रान्त अलेप्पोको पश्चिमी भागमा अल कायदा आबद्ध हयात ताहरिर अल–शाम (एचटीएस) र सिरियाली विद्रोही समूह नुरेद्दिन अल–जिन्कीबीच झडप भएको सिरियन अब्जरभेटरी फर ह्युम्यान राइट्सले जानकारी दिएको छ ।
सो झडपका क्रममा आफ्ना ५ लडाकु मारिएको एचटीएसले सोमबार पुष्टि गरेको छ । त्यसैगरी, सिरियाको उत्तरपश्चिम प्रान्त इदलिवमा विद्रोहीको अखडालक्षित भीषण आक्रमण सुरु गरिसकेको पनि एचटीएसले बताएको छ । बेलायतसँग आबद्ध अब्जरभेटरीका प्रमुख रमी अब्देल रहमानका अनुसार १२ जना एचटीएस र ५ जिन्की समूहका सदस्य मारिएका छन् । यस झडपमा परी २ जना सर्वसाधारण समेत मारिएको अब्जरभेटरीका प्रमुख रहमानले बताएका छन् । झडपमा ३५ जना घाइते भएको समेत उनले बताए ।
नुरेद्दिन अल–जिन्की विद्रोही समूह नेसनल लिबरेसन फ्रन्ट (एनएलएफ) को मुख्य खेलाडीका रुपमा रहेको छ । एनएलएफ टर्की आबद्ध विद्रोहीको संयुक्त गठबन्धन हो । एचटीएस र अन्य जिहादी समूहले इदलिब प्रान्तको आधाभन्दा बढी इलाकामा प्रभुत्व जमाएका छन् ।
सिरियाका राष्ट्रपति बसर अल असदको राजीनामाको माग गर्दै मार्च, २०११ मा सुरु भएको जनआन्दोलन केही समयपछि गृहयुद्धमा परिणत भयो ।
सो युद्धमा हजारौं जिहादी र विदेशी शक्तिको सहभागिता रहँदै गयो । सन् २०११ देखि हालसम्म जारी यस युद्धमा ३ लाख ६० हजारभन्दा बढी व्यक्तिको मृत्यु भइसकेको छ । यस आन्दोलनका क्रममा सिरियाभित्रै र छिमेकी देशमा दसौं लाख व्यक्ति शरणार्थी बन्न बाध्य भएका छन् ।
