चर्चित ‘भेनेजुयला प्रकरण’ पछि अध्यक्षद्वयबीच नै तीव्र विवाद सिर्जना भएको प्रचारवाजीसँगै तल्ला तहसम्मा आरोप–प्रत्यारोप सुरु भैसकेको सत्ताधारी नेकपाभित्र ‘आश्चर्यलाग्दो मतैक्यता’ देखा परेको छ ।
१ फागुन, २०७५ २४औं जनयुद्ध दिवसको दिन हो । तत्कालीन नेकपा (माओवादी) को आह्वान र नेतृत्वमा १ फागुन, २०५२ मा नेपालमा दीर्घकालीन जनयुद्ध सुरु भएको थियो । मुख्यतः सोही जनयुद्धकै उपलब्धिका रुपमा नेपालमा गणतन्त्र आएको छ र संघीयता, धर्मनिरपेक्षता, समावेशिता, समानुपातिकताजस्ता आंशिक सुधार भएका छन् । जनयुद्धको मुख्य लक्ष्य पूरा भई जनवादी गणतन्त्र नेपालको स्थापना हुन भने अझै पनि बाँकी नै छ ।
ठीक यसै परिवेशका बीच तत्कालीन माओवादीको एउटा पक्ष र तत्कालीन संसदवादी खेमाको एउटा पार्टी नेकपा (एमाले) एकीकृत भएर बनेको नेकपाकै नेतृत्वमा अहिले स्पष्ट बहुमतको सरकार छ । ‘मधेसवादी’ घटकहरुको समर्थनमा यो सरकारले दुईतिहाइ समर्थन हासिल गरेको छ । नेकपामा एकीकृत भएको पूर्वएमालेले जनयुद्धलाई निकै कठोर शब्दमा विरोध र आलोचना गरेको थियो । त्यो पृष्ठभूमिका अधिकांश नेता–कार्यकर्ताहरु अहिले पनि जनयुद्धको ऐतिहासिकता, महत्त्व, गरिमा र उपलब्धिलाई स्वीकार गर्न तयार देखिएका छैनन् ।
तर, यस पृष्ठभूमिका बीच बुधबार (१ फागुन, २०७५ मा) प्रधानमन्त्री एवं नेकपाका अध्यक्ष केपी शर्मा ओली र पूर्वप्रधानमन्त्री एवं नेकपाका अर्का अध्यक्ष पुष्पकमल दाहाल ‘प्रचण्ड’ ले सो पार्टीको धुम्बाराहीस्थित केन्द्रीय कार्यालयमा २४औं जनयुद्ध दिवस मनाउने बताइएकाे छ । त्यसैगरी, देशभर आ–आफ्नो सापेक्षतामा विभिन्न कार्यक्रम गरी जनयुद्ध दिवस मनाउन नेकपाका महासचिव विष्णु पौडेलले निर्देशन दिएका छन् । पार्टीभित्र विवादको चर्चा भैरहेका बेला पार्टीभित्र एकताको सन्देश दिनेगरी महासचिव पौडेलको निर्देशन आएको सो पार्टीका नेता–कार्यकर्ताले जनाएका छन् ।
आइतबार रुपन्देहीमा आयोजित एक कार्यक्रममा बोल्दै पौडेलले भेनेजुयलाबारे सचिवालयले जारी गरेको विज्ञप्ति नै आधिकारिक रहेकाले विवाद नगर्न अपिल गरे । यस विषयमा ओली–प्रचण्ड एकमत रहेकाले अनावश्यक शंका नगर्न पनि उनले आग्रह गरे ।
सोही कार्यक्रममा पौडेलले फागुन १ गते केन्द्र, प्रदेश र स्थानीय तहमा जनयुद्ध दिवस मनाइने उल्लेख गर्दै त्यसको तयारीमा लाग्न नेता–कार्यकर्ताहरुलाई निर्देशन दिए । महासचिवकै निर्देशनअनुसार संयुक्त अखिल (अखिल र अखिल क्रान्तिकारी) ले जनयुद्ध दिवसको तयारी थालेका छन् ।
फागुन १ गते नै सरकारले ‘प्रधानमन्त्री रोजगार’ कार्यक्रमको घोषणा गर्ने कार्यक्रम तय गरेको छ । यो कार्यक्रम सोही दिन राखिनुलाई जनयुद्धले राजनीतिक क्रान्ति गरेको भन्दै प्रधानमन्त्री रोजगार कार्यक्रमले आर्थिक क्रान्ति गर्ने सन्देश दिन खोजेको अर्थमा सो पार्टीका कार्यकर्ताले विश्लेषण गरेका छन् ।
