मेडिकल कलेजहरूले अवैध ढंगले असुलेको ३९ करोड रुपैयाँ फिर्ता गर्न आनाकानी गरेपछि सरकारले उनीहरुलाई कारबाहीको दायरामा ल्याउने भएको छ । कलेजहरुले तोकिएभन्दा १३ लाख रुपैयाँ बढी विद्यार्थीसँग लिएको पाइएपछि सरकारले कारबाहीको दायरामा ल्याउन तयारी थालेको हो ।
चितवन मेडिकल कलेज, किस्ट कलेज, युनिभर्सल मेडिकल कलेज र नेसनल मेडिकल कलेजले तोकिएभन्दा बढी शुल्क लिएको पीडित विद्यार्थीको गुनासो छ । मेडिकल कलेजहरूले बढी असुल गरेको ३९ करोड रुपैयाँ फिर्ता गर्न बाँकी रहेको विद्यार्थी संघर्ष समितिले जनाएको छ । अवैध ढंगले असुलिएको शुल्क फिर्ता गर्न सरकारले एक महिनाको अल्टिमेटम दिएको छ ।
तोकिएको शुल्कभन्दा बढी रकम लिएका मेडिकल कलेजले एक महिनाभित्र विद्यार्थीलाई शुल्क फिर्ता नगरे कारबाही गर्ने सरकारले जनाएको छ । गृह मन्त्रालयमा सोमबार बसेको गृहमन्त्री रामबहादुर थापा ‘बादल’ र शिक्षा, विज्ञान तथा प्रविधिमन्त्री गिरिराजमणि पोखरेलसहित दुई मन्त्रालयका पदाधिकारीको बैठकले ठगी गरिएको रकम फिर्ता नगरे कलेजहरुमाथि कारबाही गर्ने निर्णय गरेको खबर प्रशान्त वलीको बाइलाइनमा मंगलबारको राजधानी दैनिकमा प्रकाशित छ ।
