कोरोनाभाइरसको संक्रमणले विश्व नै आक्रान्त भैरहेका बेला झन्डै दुई महिनाको अन्तरालमा आइतबार राति १० बजे नेपालमै दोस्रो व्यक्तिमा कोरोनाभाइरसको संक्रमण भेटिएको छ । स्वास्थ्यमन्त्री भानुभक्त ढकालले सोमबार आकस्मिक पत्रकार सम्मेलन गरेर राजधानीमा कोरोना संक्रमति व्यक्ति भेटिएको जानकारी गराएका हुन् ।
१९ वर्षिया ती बिरामीको टेकुस्थित शुक्रराज ट्रपिकल तथा सरुवारोग अस्पतालमा उपचार भइरहेको छ । फ्रान्सबाट दोहा (कतारको राजधानी) हुँदै ४ चैतमा नेपाल आएकी उनी होम क्वारेन्टाइनमै बसेकी थिइन् । नेपाल भित्रँदा उनमा कोरोनाको कुनै लक्षण देखिएको थिएन ।
टेकुस्थित राष्ट्रिय जनस्वास्थ्य प्रयोगशालामा शुक्रबार दिइएकाे नमूना परीक्षण गर्दा भने उनमा कोरोना संक्रमण भएको आइतबार पुष्टि भएको छ । उनीसँगै आएका र परिवारका अरु सदस्यहरुको पहिचान गरी सबैलाई आइसोलेसनमा राखेर परीक्षण गर्ने तयारी भइरहेको मन्त्रालयले जनाएको छ ।
एक जनामा कोरोना पुष्टि भए पनि धैर्यता नगुमाउन र सावधानी अपनाएर संक्रमणलाई विस्तारित हुन नदिन स्वास्थ्यमन्त्री ढकालले सबैसँग अपिल गरेका छन् । यसअघि (झन्डै दुई महिना पहिले) चीनबाट आएका एक नेपालीको स्वास्थ्य परीक्षण गर्दा कोरोना पोजेटिभ देखिएको थियाे । तर, उपचारपछि निकाे भएर उनी घर फर्किसकेका छन् ।
यो पनि पढ्नोस्–
कोरोनाभाइरसबाट बच्न के–के गर्ने, के–के नगर्ने ?
