दक्षिणी जापानको क्युशु द्विपमा अवस्थित आसोपर्वत श्रृङ्खलामा शनिबार मध्यरातपछि ज्वालामुखी बिस्फोटन भएको जापानी जलवायु विज्ञान समितिले जनाएको छ ।
स्थानीय समयानुसार शनिबार बिहान १ः४६ मा सो पर्वतमालाको एउटा शिखरबाट ज्वालामुखी निस्कर्इ ११ हजार मिटर आकाश माथिसम्म खरानी र आगोको लप्का उठेको थियो ।
जलवायु विज्ञान समितिले उक्त ज्वालामुखी विस्फोटन ५ औं स्केलको तेस्रो लेभलको मापन गरेको छ । बिस्फोटनका कारण पर्वतबाट ठूला ठूला चट्टानहरु खस्ने सम्भावना रहेकोले मानिसहरुलाई उक्त क्षेत्रनजिक जान निषेध गरिएको छ ।
यद्यपि, यस घटनाबाट हालसम्म कुनै भौतिक वा मानवीय क्षति नभए तापनि उक्त क्षेत्र वरपरका स्थानीय वासिन्दालाई ज्वालामुखीय ग्यास, लाभा र तातो खरानीबाट बच्नसमेत सो समितिले सचेत गराएको छ ।
गतः अप्रिलमा गएको ठूलो भूकम्पले दक्षिणपश्चिमी जापानको अधिकांश भू–भागलार्इ शिथिल बनाएको कारण अहिले ज्वालामुखी बिस्फोटन भएको हो कि भनी सो समितिले आशङ्का गरेको तर पुष्टि भने भै नसकेको जनाइएको छ ।
आसो पर्वतमाला जापानका अति सक्रिय ज्वालामुखीय पर्वतश्रृङ्खलाहरु मध्ये एक मानिन्छ । गतः शुक्रबार पनि यही पर्वतमालाको एउटा शिखरमा राति दश बजे तिर हल्का बिस्फोटन भएको थियो । यसअघि, पाँच महिना पहिले गतः १ मे का दिन पनि यस्तै एउटा बिस्फोटन भएको थियो ।
