अमेरिकी राष्ट्रपति डोनाल्ड ट्र्म्पको आप्रवासी नीति र मेक्सिकोसँगको सीमामा पर्खाल लगाउन मेक्सिकोले नै रकम लगाउनुपर्ने अडानको विरोधमा मेक्सिकोमा हजारौंले प्रदर्शन गरेका छन् ।
मेक्सिकोका एक दर्जनभन्दा बढी सहरमा सो प्रदर्शन भएको बताइएको छ । मेक्सिको सिटीलयागत देशका अन्य सहरमा विरोध प्रदर्शन भएको छ । प्रदर्शनको क्रममा मेक्सिकन झन्डा बोकेका प्रायः व्यक्तिले सेतो लुगा लगाएका थिए ।
प्रदर्शनमा सहभागी व्यक्तिले अङ्ग्रेजी र स्पेनी भाषामा लेखिएका झन्डा बोकेका थिए । मेक्सिकाली जनताले निकालेको यो जुलुस शान्तिपूर्ण रहेको थियो ।
एक जना प्रदर्शनकारीले बोकेको प्लेकार्डमा डोनाल्ड ट्रम्पलाई सङ्केत गर्दै ‘तिम्रो साहसलाई विश्वका धेरै व्यक्तिले घृणा गर्छन्’ भनेर लेखिएको थियो । प्रदर्शनका क्रममा अमेरिकी राष्ट्रपतिलाई मेक्सिकोको सम्मान गर्न समेत माग गरिएको थियो ।
