(भिडियोमा हेर्नोस् शान्ति पौडेलका चुनावी प्रतिबद्धता)
नेपाल कम्युनिस्ट पार्टी (एमाले) का जिल्ला अध्यक्ष शान्तिप्रसाद पौडेल रामेछाप (क) बाट प्रदेशसभा सदस्यको उम्मेदवार बनेर चुनावी मैदानमा होमिएका छन् ।
हालै राजधानीमा आयोजित एक कार्यक्रममा उनले आफ्ना, जिल्ला पार्टीका, समग्र एमालेका र वाम गठबन्धनका चुनावी एजेन्डा र प्रतिबद्धताहरु जाहेर गरे ।
आम जनता, मतदाता, पार्टी कार्यकर्ता र वाम गठबन्धनमा आबद्ध सबैका सामु पौडेलले जाहेर गरेको प्रतिबद्धताको भिडियो रेकर्ड हामीले यहाँ प्रस्तुत गरेका छौं ।
को हुन् शान्तिप्रसाद पौडेल ?
गोकुलगंगा गाउँपालिका– ५ (तत्कालीन नामाडी गाविस) मा २७ जेठ, २०२३ मा जन्मेका पौडेल गोविन्दप्रसाद–नन्दकुमारीका ७ छोरा र ३ छोरीमध्येका जेठा छोरा हुन् । ग्रामीण विकास (आरडी) मा स्नातकोत्तरसम्मको अध्ययन पूरा गरेका पौडेलका १ छोरा र १ छोरी छन् ।
२०५५ देखि पार्टीको जिल्ला कमिटी सदस्य रहेर काम गर्दै आएका उनले २०६४ देखि ०६६ सम्म जिल्ला कमिटीको उपसचिवका रुपमा भूमिका निर्वाह गरे । ०६६ देखि ०६९ सम्म जिल्ला सचिवका रुपमा क्रियाशील रहेका पौडेलले ०६९ यता जिल्ला अध्यक्ष बनेर पार्टी हाँकिरहेका छन् ।
०३८ मा कमला मावि (सिन्धुली) बाट अनेरास्ववियु (पाँचौं) को सदस्य बन्दै राजनीतिक मैदानमा उत्रेका पौडेले ०४३ मा गोपाल शाक्यबाट पार्टी सदस्यता प्राप्त गरे । ०४४ मा पार्टीको ३ नं. इलाका काठमाडौंमा ‘सक्रिय दल’ मा आबद्ध भएका उनी ०४६ देखि ‘रामेछाप संगठन केन्द्र’ हुँदै ३ कार्यकालसम्म सम्पर्क मञ्चमा आबद्ध रहे ।
०४७ मा पार्टीको संगठित सदस्यता प्राप्त गरेका शान्तिप्रसाद पौडेलले ०५२ देखि ०५५ सम्म पार्टीको इलाका सचिव बनेर रामेछापमै राजनीतिक भूमिका निभाए । ०५४ मा नामाडी गाविस अध्यक्ष बनेका उनी ०५४ देखि ०५९ सम्म जिल्ला विकास समिति रामेछापको सदस्य भए ।
