हालै सम्पन्न उपचुनावमा अन्यत्र निकै राम्रो परिणाम ल्याउँदा पनि विगतमा ठूलो मतान्तरले विजय हासिल गरेको भक्तपुर निर्वाचन क्षेत्र नं. १ (क) मा भने सत्ताधारी नेपाल कम्युनिस्ट पार्टी (नेकपा) पराजित हुन पुग्यो । निर्वाचनमा सफलता हासिल गर्न नसकेपछि हाल विभिन्न टीकाटिप्पणी सुरु भएका छन् । पञ्चायतकालदेखि नै भक्तपुरको पार्टी संगठन निर्माणमा खटेका र नेकपामा वैचारिक नेताको परिचय समेत बनाएका भट्टराईसँग यही सेरोफेरोमा रहेर गरिएको कुराकानीको मुख्य अंश यहाँ प्रस्तुत छ–
तपाईंको पार्टी नेकपाले भक्तपुरको उपचुनावमा किन हार खायो ? मुख्य कारण के–के हुन् भन्ने ठान्नुहुन्छ ?
हेर्नोस्, पराजयको प्रमुख र एक मात्र कारण पार्टीको आन्तरिक तयारी नपुग्नु नै हो । पार्टी एकताको डेढ वर्ष नाघिसक्दा पनि भक्तपुरमा तलसम्मको एकता गर्न सकिएन । एक वर्षदेखि हजारौं पार्टी सदस्यहरु पूरै असंगठित र बेखबर हुने स्थिति पैदा भयो । जिल्ला कमिटी बनेको छ महिना बितिसक्दासम्म पनि नगर र वडा कमिटी निर्माण हुन सकेनन् । पार्टीले गरेका राम्रा कामलाई पार्टी संगठनमार्फत् जनतामा सम्प्रेषित गर्न सकिएन । पार्टी र सरकारप्रति विपक्षीले फैलाएका आधारहीन भ्रम चिर्न सकिएन । अर्कातिर, ‘सामूहिक निर्णय–व्यक्तिगत जिम्मेवारी’ को परम्पराबाट चलेको पार्टी यो अवधिमा त्यसरी चल्न सकेन । सबैलाई समेट्ने प्रयास भएन । केही नेताको कानेखुशीलाई निर्णय मानेर चल्नुपर्ने परिस्थिति उत्पन्न भयो ।
पराजयमा टिकट वितरणको लफडा चाहिँ जिम्मेवार छैन ? अन्तर्घातको चर्चा पनि सुनिँदैछ नि ?
नेकपाको सचिवालयले नेकपाका जिल्ला सचिव डीपी ढकाललाई टिकट दिने निर्णय गरेपछि जिल्लाका केही नेताहरुले जिल्ला पार्टी कार्यालयमा तालाबन्दी मात्र गर्नु भएन, निर्णय उल्टाउन शीर्ष नेताहरुकहाँ ‘डेलिगेसन’ जाने काम समेत गर्नुभयो । त्यसले कार्यकर्तामा क्षणिक रुपमा निराशा जगाउने र विभाजित तुल्याउने वातावरण बनायो भने विपक्षीलाई उत्साहित बनाउने काम गर्यो । त्यस कार्यले केही क्षति पुर्याए पनि केही दिनभित्रै पार्टी एकजुट भएर चुनावमा होमियो । पार्टीको सम्पूर्ण पङ्क्ति इमानदारितापूर्वक आफ्ना उम्मेदवारलाई जिताउन लागेको यथार्थ हो । त्यसकारण अन्तर्घातको हल्ला बिल्कुलै निराधार हो ।
सांसद महेश बस्नेतले त ‘पार्टीले उपयुक्त उम्मेदवार छनोट नगर्दा पराजय भोग्नु परेको’ टिप्पणी गरेका छन् नि ?
यो उहाँको हल्काफुल्का टिप्पणी हो । यस्ता टिप्पणीले उहाँको कद घटाइरहेछ । शतप्रतिशत ठीक को हुन्छ ? गएको निर्वाचनमा शतप्रतिशत सही उम्मेदवार त उहाँ पनि त हुनुहुन्थेन । पार्टीले टिकट दियो, तत्कालीन एमालेका अध्यक्ष राजेन्द्र राजथलाको नेतृत्वमा पार्टी संगठन मजबुत थियो, उहाँले चुनाव जित्नुभयो । राष्ट्रका लागि चाहिने सही ऐन–कानुन निर्माणमा केन्द्रित हुनुपर्ने उहाँको परिभाषित जिम्मेवारी हो, मेयर र वडाध्यक्षका कामको पछिपछि कुद्ने होइन । उहाँ पार्टीका नेता–कार्यकर्ता र आम मतदाताको निरन्तर निगरानीमा हुनुहुन्छ, परीक्षामा हुनुहुन्छ । आफैं परीक्षामा भएको व्यक्तिले अरुलाई अनुपयुक्तताको ‘सर्टिफिकेट’ बाँड्दै हिँड्न सुहाउँदैन ।
चुनाव त हार्नुभयो, अब चाहिँ कसरी अगाडि बढ्दै हुनुहुन्छ त ?
पार्टीको ठूलो शक्ति हुँदाहुँदै, पार्टीको सम्पूर्ण शक्ति लाग्दालाग्दै अप्रत्याशित नतिजा भोग्नुपर्दा पीडा त हुँदोरहेछ । हामी गम्भीर समीक्षा गर्छौं । थप एकताबद्ध भएर अगाडि बढ्छौं र गुमेको किल्ला अर्को चुनावमा फिर्ता गर्छौं ।
