नेपाल कम्युनिस्ट पार्टी (नेकपा) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ ले मधेशमा देखिएको नागरिकताको समस्या अब सधैंका लागि अन्त्य हुने बताएका छन् ।
सिरहाको अर्नमा गाउँपालिका– १ स्थित महनौरमा सोमबार स्वास्थ्य चौकी भवनको उदघाटन गर्दैै पूर्वप्रधानमन्त्री प्रचण्डले भने– ‘नागरिकताको समस्या विगतमा जसरी थियो, अब सदाका लागि समाधान गर्ने गरी नागरिकता विधेयक संसदमा प्रस्तुत भइसकेको छ र समितिमा गम्भीर छलफल हुँदैछ, तपाईंहरु ढुक्क हुनोस् अब नागरिकताको समस्या मधेशको समस्याका रुपमा रहँदैन ।’
आवश्यकता र औचित्यका आधारमा संविधान संशोधन गर्ने सहमतिअनुरुप सङ्घीय समाजवादी फोरम सरकारमा आएको उल्लेख गर्दै संविधानलाई आवश्यक संशोधन गरेर मधेशी र जनजाति उपेक्षित समुदायको अधिकार सुनिश्चित गर्ने बाटो खुला रहेकाले संविधानमा संशोधन हुने उनले बताए ।
तराई–मधेशको पूर्वाधार विकासका लागि सरकारले सडक, खानेपानी, स्वास्थ्य, शिक्षालगायत सबै विषय समेटेर करिव २ अर्ब रूपैयाँको विशेष प्याकेज ल्याउन लागेको जानकारी दिँदै त्यसबाट मधेशले ठूलो फड्को मार्ने दाबी उनले गरे । ‘मधेशको विकासविना मधेशी जनताको आवश्यकतालाई सम्बोधन गर्न सकिन्न भन्नेमा प्रधानमन्त्री र मेरो बीचमा गम्भीर छलफल भएको छ,’ प्रचण्डले भने– ‘यसबारे हामी स्पष्ट छौं, त्यो कुरा यो सरकार र नेकपाले मात्र पूरा गर्न सक्छ भन्नेमा विश्वस्त छौं ।’
मुलुकबाट बेरोजगारी समस्या अन्त्यका लागि सरकार र आफ्नो पार्टीले ध्यान केन्द्रित गरेको बताउँदै बेरोजगार युवालाई स्वदेशमै रोजगारी दिने र रोजगारी दिन नसकिएकालाई बेरोजगार भत्ता दिने तयारी सरकारले गरेको उनले बताए । तराई–मधेशमा निजगढ अन्तर्राष्ट्रिय विमानस्थल निर्माण, पूर्व–पश्चिम रेल–वे, फास्ट ट्र्याक निर्माण, औद्योगिकग्राम स्थापना, धार्मिकस्थलको संरक्षण र विकास, मेडिकल कलेज र विश्वविद्यालयको स्थापना, सिँचाइका पूर्वाधारहरुको विकास, कल–कारखानाको स्थापनालगायतका विकास निर्माणका योजना विस्तारको गृहकार्य अगाडि बढाइएको जानकारी उनले दिए ।
सिरहा जिल्ला आँपको दृष्टिकोणले अग्रणी रहेकाले सिरहालाई आँप क्षेत्रका रुपमा विकास गर्न आफूले पहल र प्रयत्न गर्ने प्रतिबद्धता व्यक्त गर्दै सिरहालाई धानको सुपर जोनका रुपमा घोषणा गरी लगानी बढाउनु पर्नेमा समेत उनले जोड दिए ।
कार्यक्रममा नेकपाका २ नम्बर प्रदेश सहइन्चार्ज तथा पूर्वमन्त्री विश्वनाथ साह, प्रतिनिधिसभाका सांसद लीलानाथ श्रेष्ठ, प्रदेशसभा सदस्यहरु रामकुमार यादव, प्रमोद यादव, जगत यादवलगायतले तराई–मधेशको विकासका लागि सरकारले छिटो विशेष कार्यक्रम ल्याउनुपर्ने माग गरे । सहरी विकास तथा भवन निर्माण आयोजना राजविराजका प्रमुख रमेश थिङले कूल १ करोड २१ लाख ७६ हजार रुपैयाँको लागतमा स्वास्थ्य चौकी भवन निर्माण गरिएको जानकारी दिए ।
अर्नमा गाउँपालिकाका अध्यक्ष ठक्कु महतोको अध्यक्षतामा आयोजित उदघाटन कार्यक्रममा स्वास्थ्य चौकी निर्माणका लागि जग्गा दिने जग्गादाताहरुलाई अध्यक्ष प्रचण्डले दोसल्ला ओढाएर सम्मान गरेको खबर राससले प्रेषित गरेको छ ।
–––
