नेपाली लगानीमा अमेरिकामा स्थापित सामाजिक सञ्जाल ‘सगुन डटकम’ ले कम्पनीको पहिलो चरणको निष्कासन (आईपीओ) मा इच्छुक तथा योग्य लगानीकर्ताका लागि लगानीको अवसर खुला गरेको छ ।
‘सगुन’ को नेपाल कार्यालयले बुधबार पत्रकार सम्मेलन गरी वासिङ्टन डिसीमा प्रधान कार्यालय रहेको ‘सगुन’ ले लगानी गर्न चाहने योग्य लगानीकर्तालाई कम्तिमा ५ हजार र बढीमा १८ हजार अमेरिकी डलर लगानी गर्ने अवसर प्रदान गरेको जानकारी दिएको छ ।
‘प्रयोगकर्तामाझ पुगेर सगुनलाई एउटा उदाहरणीय सामाजिक सञ्जाल बनाउन र अन्य सामाजिक सञ्जालमा प्रयोगकर्ताले भोग्नुपर्ने नकारात्मक अनुभव हटाउनका लागि हामी लागिपरेका छौँ’, अमेरिकाबाट नेपाली पत्रकारसँग कुरा गर्दै ‘सगुन’ का संस्थापक गोविन्द गिरीले भने ।
उनले विश्व बदल्ने लक्ष्य लिएको ‘सगुन’ मा सार्वजनिक सहभागिता जनाएर सहकार्य गर्न लगानीको मौका प्रदान गरिएको र यसका लागि कानुनी रूपमा बाटो खोलिदिएकामा युएस जब्स एक्टलाई धन्यवाद दिए ।
विश्वब्यापी रूपमा फैलिएको सामाजिक सञ्जाल ‘सगुन’ ले विश्वभर रहेका लगानीकर्तालाई इक्विटी क्राउड फन्डिङ पहलमा बैंकरोलमार्फत अवसर प्रदान गरिरहेको कम्पनीले जनाएको छ । सेयर खरिदबाट आएको पुँजीबाट ‘सगुन’ का प्रयोगकर्ता विस्तार गर्ने, थप नयाँ विशेषता बढाउँदै जाने र मोबाइल एपको सुरुआत गरिने बताइएको छ ।
