हाल बेलायतमा रहेका साहित्यकार कृष्ण बजगाईंले प्रसिद्ध साहित्यकार जर्ज बर्नाड शाको निवास ‘शा कर्नर’ मा सोमबार आफैंले नोबेल पुरस्कार तथा ओस्कार अवार्ड विजेता आफ्नो तेस्रो लघुकथासङ्ग्रह ’कवच’ सार्वजनिक गरेका छन् ।
बेलायतको ’एयोट सन्ट लरेन्स’ मा अवस्थित निवासमा करिब पैंतालीस वर्ष बिताएका शाको त्यहीं निधन भएको थियो । उनको निवासलाई पुरातात्विक, ऐतिहासिक स्थल तथा स्मारकहरुको सञ्चालन र सम्बर्द्धन गर्ने बेलायतको ‘नेसनल ट्रस्ट’ ले सङ्ग्रहालयका रुपमा सञ्चालनमा ल्याएको छ ।
लामो समयदेखि युरोपमा बस्दैआएका बजगाईंका यसअघि कथा, लघुकथा, नियात्रा आदि गरी सात कृति प्रकाशन भइसकेका छन् । एघार वर्षदेखि उनले साहित्यिक अनलाइन ‘समकालीन साहित्य डट कम’ को समेत सम्पादन तथा प्रकाशन गर्दै आएका छन् ।
विवेक सिर्जनशील प्रकाशन, काठमाडौंले प्रकाशन गरेको सो लघुकथासङ्ग्रहमा डायोस्पोरिक जीवन, समसामयिक घटना, धर्म, राजनीति, प्रेम, यौन, शोषण, भ्रष्टाचार, विसङ्गति आदि विषयवस्तु रहेको बजगार्इंले जानकारी दिए ।
