वन अनुसन्धान तथा सर्वेक्षण विभागले आर्थिक वर्ष २०७२÷७३ मा तराईका २० जिल्लाको १७५ स्थानको वन मापन गरेको छ ।
विभागले तराईका २० जिल्लाको विभिन्न १७५ वनमा रहेको रूखको उचाइ, मोटाइ, नयाँ बिरुवाको अवस्था, पुरानो बिरुवाको अवस्था, कुन कुन प्रजातिको बिरुवा, गैरकाष्ट बिरुवा र माटोको कार्बनसम्बन्धी अध्ययन गरेको हो ।
विभागका उपसचिव डा राजेन्द्र केसीले मापन गर्दा गत वर्षको तुलनामा बोटबिरुवा र वनजङ्गल बढ्दै गएको बताए । उनले भने, “हामी विभिन्न क्षेत्र बनाएर वनको अध्ययन गर्छाैँ अध्ययन गरेका मध्ये धेरै क्षेत्रमा वन बढेको पाइएको छ ।”
डा केसीले नेपाली जनताको जीविकोपार्जनमा सुधार ल्याउन र वनको संरक्षण तथा संवद्र्धनका लागि विभाग गम्भीर भएर लागेको बताए । उनले सरकारले अनुसन्धान क्षेत्रलाई ज्यादै धेरै प्राथमिकतामा नराखेको भए पनि आफूहरु अनुसन्धानमा दृढ भएर लागेको स्पष्ट पारे ।
विभागले हाल सुनसरी, हेटौँडा, बुटवल, सुर्खेत र धनगढी गरी पाँचवटा क्षेत्रीय स्थलगत इकाईमार्फत वनको अनुसन्धान गर्दै आएको छ । आव २०७२÷७३ मा कपिलवस्तु जिल्लामा रहेको सबै सामुदायिक तथा कबुलियती वनको अनुसन्धान र सर्वेक्षण गरिएको विभागले जनाएको छ ।
यसअघि विभागले २०६७ देखि २०७१ सालसम्म गरेको अध्ययनमा नेपालको कुल क्षेत्रफलको ४४.७४ प्रतिशत जमिन वन क्षेत्रले ढाकेको तथ्याङ्क सार्वजनिक गरेको थियो ।
