विद्युतीय झड्कामा परी दुवै हात गुमाएका गुन्सीभदौरे– १, रामेछापका युवक सुदर्शन गौतमले प्रमुख भूमिकामा अभिनय गर्न लागेको चलचित्र ‘हिम्मतवाला’ (बहादुर मानिस) को फस्र्टलुक पोस्टर र शुभमुहुर्त गरिएको छ ।
क्यानडा र अमेरिकामा छायांकन हुने तयारी भइरहेको चलचित्र हिम्मतवालाको फस्र्टलुक पोस्टरलाई सीएनएन हिरो अनुराधा कोइरालाले सार्वजनिक गरेकी थिइन् ।
क्यानडाको मिसेसागा सिटीको पार्क इन् र्याडिसन होटलमा आयोजित ‘सुपर कमेडी मेगा नाइट’ मा अनुराधा कोइराला, हास्यकलाकार दिपकराज गिरी र दिपाश्री निरौलालगायतले संयुक्त रुपमा चलचित्र हिम्मतवालाको पोस्टर सार्वजनिक गरेका हुन् ।
सोही क्रममा टंक बुढाथोकीको स्वर र संगीतमा सजिएको ‘म हुँ हिम्मतवाला’ गीत पनि सार्वजनिक गरिनुका साथै उक्त गीतमा कलाकारहरुले नृत्य पनि प्रस्तुत गरेका थिए । पुराना निर्देशक हरि शिवाकोटीले निर्देशन गर्न लागेको यस चलचित्रमा नायक सुदर्शन गौतम एक्सन अवतारमा प्रस्तुत हुँदैछन् ।
सार्वजनिक गरिएको पोस्टरमा सुदर्शन एक्लै देखिएका छन् । यसअघि चलचित्रलाई ईश्वर थापाले निर्देशन गर्ने कुरा थियो तर केही प्राविधिक कारणले गर्दा हरि शिवाकोटीले निर्देशन गर्ने टुंगो लागेको हो ।
दर्जनौ चर्चित पुस्तकहरु समेत लेखिसकेका हरि शिवाकोटीले ‘सौता’, ‘वेदना र मुक्ति’, अमेरिकामा निर्मित पहिलो नेपाली चलचित्र ‘इस्टमित्र’, क्यानडामा निर्मित चलचित्र ‘मैले विरोध गरेको छैन’ लगायतका चलचित्रहरु निर्देशन गरिसकेका छन् ।
सार्वजनिक गरिएको चलचित्र ‘हिम्मतवाला’ कोे पोस्टर हेर्दा सुदर्शन फरक भूमिकामा प्रस्तुत हुन लागेको सजिलै अनुमान गर्न सकिन्छ । चलचित्र हिम्मतवालीमा पहिलो पटक काम गरेर चर्चा बटुलेका सुदर्शनले आफू यस चलचित्रमा बिल्कुलै फरक भूमिकामा देखिन लागेको कार्यक्रममा बताए ।
चलचित्रको छायांकन अगष्टदेखिसुरु हुँदैछ । कानी मल्टीभिजन आईएनसी र जीटीए लाइन्स क्लबको संयुक्त आयोजनामा भएको ‘सुपर कमेडी मेगा नाइट’ मा सहभागी हुनका लागि नेपालबाट माइती नेपालकी अध्यक्ष अनुराधा कोइराला, हास्यकलाकार दिपकराज गिरी र दीपाश्री निरौला क्यानडा पुगेका थिए । समाजमा रहेर उत्कृष्ट काम गर्ने करिव ३० जनालाई उक्त सुपर मेगा कमेडी नाइटमा अभिनन्दन समेत गरिएको थियो ।
