मेलम्ची खानेपानी आयोजना निर्माणको ठेक्का लिएको इटालियन ठेकेदार कम्पनी सीएमसी दि रेभेन्नाले शनिबार बेलुकासम्म आयोजनालाई कुनै जवाफ पठाएको छैन ।
आयोजनाले शुक्रबारसम्म कम्पनीका प्रतिनिधि र कामदार नेपाल नफर्के ठेक्का रद्द गर्न आवश्यक प्रक्रिया सुरु गर्ने चेतावनीसहितको इमेल ठेकेदार कम्पनीलाई पठाएको थियो ।
‘ठेकेदार कम्पनीले हामीलाई आजसम्म कुनै रेस्पोन्स नै गरेन,’ आयोजनाका कार्यकारी निर्देशक सूर्यराज कँडेलले भने– ‘सकेसम्म पुरानै कम्पनीबाट बाँकी काम सम्पन्न गरौं, राष्ट्रिय गौरवको आयोजना समयमा सम्पन्न गरौं भन्ने थियो तर सम्भव भएन ।’
पुरानै ठेकेदार कम्पनी फर्काउन सके नेपाली सप्लायर्सको उठाउन बाँकी रकम उठाउन सजिलो हुन्छ भनेर आयोजनाले प्रयास गरेको भए पनि सम्भव नभएको उनले बताए ।
‘सामान्य प्रक्रियामा गए मेलम्ची सकिन अझै दुई वर्ष’
ठेकेदार कम्पनीले काम छाडिसकेको अवस्थामा सामान्य प्रक्रियामा गए मेलम्ची खानेपानी आयोजनाको बाँकी काम सम्पन्न हुन अझै दुई वर्षभन्दा बढी समय लाग्ने आयोजनाले जनाएको छ ।
नेपाल सरकारको ठेक्कासम्बन्धी नियम र एसियन डेभलपमेन्ट बैंक (एडीबी) को सबै प्रक्रिया सम्पन्न गर्न ९ महिनाभन्दा बढी लाग्ने र त्यसपछि ठेकेदार कम्पनीलाई काम सुरु गर्ने समय दिनुपर्नेलगायतको नियम रहेको कार्यकारी निर्देशक कँडेलले बताए को खबर आइतबारका पत्रपत्रिकामा प्रकाशित छ ।
