प्रधानमन्त्री एवं नेकपाका अध्यक्ष केपी शर्मा ओलीले अर्का अध्यक्ष पुष्पकमल दाहाल ‘प्रचण्ड’ को वक्तव्यमा ‘शब्द चिप्लिएको’ भन्दै अमेरिकी राजदूतलाई त्यसबाट नेपाल–अमेरिका सम्बन्धमा असर नपर्ने र पर्नु नहुने कुरा सम्झाएका छन् ।
भेनेजुएला प्रकरणबारे ‘प्रचण्ड’ को वक्तव्यप्रति असन्तुष्ट अमेरिकी राजदूत र्यान्डी बेरीलाई सोमबार भेट दिँदै प्रधानमन्त्री ओलीले राष्ट्रपति डोनाल्ड ट्रम्पको जिब्रो चिप्लिएजस्तै रूपमा लिन अर्थ्याएका थिए । बुधबार बिहान बालुवाटारमा संक्षिप्त जवाफ दिँदै ओलीले भने– ‘हाम्रो कुनै विवाद होइन, कहिलेकहीं (राष्ट्रपति) ट्रम्पको पनि ‘टङस्लिप’ हुन्छ, हाम्रा प्रचण्डजीको पनि ‘वर्डस्लिप’ भएको हो । स्लिप भएपछि भयो, दुई–तीन शब्द बढी गएको हो ।’
ह्वाइटहाउसमा सुरक्षा अधिकारीहरूको ब्रिफिङमा ट्रम्पले ‘नेपाल भारतमा पर्ने होइन र’ भन्दै अज्ञानता प्रकट गरेको खुलासा हालै ‘टाइम’ म्यागेजिनले गरेको थियो । ‘यस्ता संवादका विषयवस्तुबारे हामी साधारणतया प्रतिक्रिया दिँदैनौं,’ प्रधानमन्त्री ओलीसँगको भेटबारे जिज्ञासा राख्दा अमेरिकी दूतावासकी प्रवक्ताले भनिन्– ‘तर, राजदूतले प्रधानमन्त्रीसँग अमेरिका–नेपाल सम्बन्धबारे बोल्न पाउने अवसरको स्वागत गर्नुभयो ।’
बुझिएअनुसार राजदूत बेरीले आगामी सम्बन्ध कसरी अर्थपूर्ण र महत्त्वशाली बनाउने भन्नेबारे प्रधानमन्त्रीसँग आफ्ना भनाइ राखेका थिए । द्विदेशीय सम्बन्ध र साझेदारी लामो रहेको र अब यो साझेदारीको नेपाललाई कस्तो अर्थ छ भन्ने कुरा काममा हेर्न चाहेको उनले बताएका थिए ।
प्रधानमन्त्री ओलीले बुधबार राति नेपाल टेलिभिजनको ‘जनतासँग प्रधानमन्त्री’ नामक साक्षात्कारमा पनि दाहालको वक्तव्य जरुरी नभएको प्रस्ट पारे । ‘अलिकति स्लिप भएकै हो, अघिल्लै दिन वक्तव्य नदिई नहुने जरुरी थिएन, भोलिपल्ट म (स्वदेश) आउँदै थिएँ, वक्तव्यमा उपयुक्त भाषा पनि भएन भन्ने छ’– अध्यक्ष दाहालको नाम नलिई ओलीले भनेको खबर बिहीबारको कान्तिपुर दैनिकमा प्रकाशित छ ।
