पशुपतिनाथका नाममा काठमाडौं उपत्यकामै १८ हजार रोपनी जग्गा छ । आनाकै लाखौं पर्ने यति धेरै जग्गाको आयस्ता अर्बौं हुन सक्छ । तर, १७ हजार रोपनीबाट भाडा उठ्छ– वर्षको जम्माजम्मी ७४ लाख रुपैयाँ ।
बरु १ हजार १ सय २६ रोपनी उपभोग गर्ने त्रिभुवन विमानस्थलले वर्षको करोड तिर्छ । त्यो पनि अति कम हो । पशुपति क्षेत्र विकास कोषका तीन वटा कार्यालयले वार्षिक ७४ लाख १७ हजार ९ सय ५३ रुपैयाँ मात्रै कुत पाउने गरेको जानकारी कोषध्यक्ष डा. मीलनकुमार थापाले दिएको खबर गोपीकृष्ण ढुंगाना र सुरेन्द्र काफ्लेको बाइलाइनमा साेमबारको अन्नपूर्ण पोस्ट दैनिकमा प्रकाशित छ ।
