सत्ताधारी नेपाल कम्युनिस्ट पार्टी (नेकपा) को एकता प्रक्रिया अन्तिम चरणमा पुगेका बेला प्रधानमन्त्री निवास बालुवाटारमा ‘पूर्वएमाले’ बाट हाल सचिवालय सदस्य रहेकाहरुको छुट्टै बैठक बसेको छ ।
शनिबार साँझ पार्टी अध्यक्ष एवं प्रधानमन्त्री केपी शर्मा ओली, पूर्वप्रधानमन्त्री माधवकुमार नेपाल र झलनाथ खनाल, पूर्वउपप्रधानमन्त्री वामदेव गौतम, उपप्रधान तथा रक्षामन्त्री ईश्वर पोखरेल तथा महासचिव विष्णु पौडेलको छुट्टै बैठक बसेको हो । ओलीले पूर्वएमालेका नेताहरुलाई छुट्टाछट्टै भेट गरेपछि पार्टी सचिवालयमा प्रतिनिधित्व गर्ने नेताहरुको पनि शनिबार साँझ छुट्टै बैठक बसेको हो ।
‘पूर्वएमालेको भागमा परेका विभागको जिम्मेवारी र जिल्ला इन्चार्जहरु क–कसलाई बनाउने भन्ने विषयमा अध्यक्ष ओलीले सामूहिक छलफल गर्न चाहेकाले सचिवालयसम्बद्ध नेताहरुको छुट्टै बैठक बसेको हो’– एमाले स्रोतलाई उद्धृत गर्दै टपेन्द्र कार्कीको बाइलाइनमा यो खबर आइतबारको नागरिक दैनिकमा प्रकाशित छ ।
