सिन्धुपाल्चोकस्थित मेलम्ची खोलाको पानी काठमाडौं उपत्यकामा ल्याउने काम सुरु भएको तीन दशक नाघ्यो । काम सुरु भएको ३१ वर्ष हुँदा पनि मेलम्चीको पानी आएको छैन । काम फटाफट भएमा अझै डेढ वर्ष कुर्नुपर्ने देखिएको छ ।
गत जेठ ६ गते मन्त्रिपरिषद् बैठकले मेलम्ची खानेपानी आयोजनाको आवश्यक निर्माण कार्य गर्न मेलम्ची खानेपानी विकास समितिलाई निर्देशन दिएपछि आयोजनाले निर्माणको बाँकी काम गर्न गएको जेठ १७ गते बोलपत्र गरेको छ । सुरुङ निर्माणका लागि दुई र हेडबक्स निर्माणका लागि दुई वटा कम्पनीले बोलपत्र दर्ता गराएका थिए ।
तीमध्ये एउटा चिनियाँ कम्पनीको बोलपत्र छ । सबै बोलपत्रको प्राविधिक मूल्याङ्कन गरी स्वीकृतिका लागि एसियाली विकास बैङ्क (एडीबी) मा पठाइएको जानकारी समितिका कार्यकारी निर्देशक सूर्यराज कँडेलले दिए । एडीबी नै आयोजनाको प्रमुख लगानीकर्ता हो ।
कार्यकारी निर्देशक कँडेल भन्छन्– ‘बोलपत्रको प्राविधिक मूल्याङ्कन गरी एडीबीमा पठाएका छौं, दुई–तीन हप्तामा सम्झौता हुन सक्छ, आउने २०७७ असार मसान्तसम्म अधिकांश काम सक्ने योजना छ ।’ पटक–पटक सर्दै आएको मेलम्चीको पानी काठमाडौं आउने ‘भाखा’ फेरि डेढ वर्ष सरेको खबर लक्ष्मण दर्नालको बाइलाइनमा आइतबारको गोरखापत्र दैनिकमा प्रकाशित छ ।
