सम्झौताअनुसार काम भएको भए पूर्वी सुर्खेतको गुर्भाकोट नगरपालिकाअन्तर्गत पर्ने सुवाघाट–टुँडिखेल जोड्ने सडक गत आर्थिक वर्षभित्रै निर्माण सम्पन्न भएर गाडी सञ्चालन भइसक्थे । दुई वर्षभित्र निर्माण सम्पन्न गर्ने गरी २५ किलोमिटर यो सडक निर्माणको जिम्मा लुम्बिनी–एमके–लोहनी जेभी काठमाडौंले लिएको थियो । गत आर्थिक वर्षभित्रै निर्माण सम्पन्न हुनुपर्ने यो सडकको भौतिक प्रगति २१ प्रतिशत मात्रै छ ।
२०७४ असार २८ मा सो निर्माण कम्पनीले १२ करोड ४५ लाख ४० हजार ९ सय ४२ रुपैयाँमा २०७६ असार मसान्तभित्र काम सक्ने गरी ठेक्का सम्झौता गरेको थियो । सम्पन्न गर्ने समयसम्म २१ प्रतिशत मात्रै भौतिक प्रगति गरेको कम्पनीलाई सडक डिभिजन कार्यालय चौरजहारी (रुकुम पश्चिम) ले एक वर्ष म्याद थपेको छ ।
प्रदेश मन्त्रालय मातहत आउनुअघि यो सडक डिभिजन सडक कार्यालय सुर्खेतको कार्यक्षेत्रभित्र थियो । उतिबेलै समयमै काम सम्पन्न गर्न डिभिजन सडक कार्यालयले निर्माण कम्पनीलाई तीन पटक पत्र काट्यो । निर्माण कम्पनीले कुनै पनि पत्रको जवाफ दिएन । ‘उतिबेला निर्माण कम्पनीबाट एउटै पत्रको पनि जवाफ आएन्,’ डिभिजन सडक कार्यालयका एक कर्मचारीले भने– ‘अहिले प्रदेश मातहत गएपछि झन् डामाडोल भएको सुनेका छौं ।’
अहिले धेरैजसो सडक आयोजना प्रदेश सरकारअन्तर्गतको भौतिक पूर्वाधार विकास मन्त्रालय मातहत छन् । सुवाघाट–टुँडिखेल सडकको जिम्मा पाएको लुम्बिनी–एमके–लोहनी जेभीका सञ्चालक प्रदेश सरकारका भौतिक पूर्वाधार विकास मन्त्री खड्कबहादुर खत्री हुन् । सुर्खेतमा उक्त सडकसहित मन्त्री खत्री सञ्चालक रहेको निर्माण कम्पनीले चार वटा सडकको ठेक्का पाएको छ । सो कम्पनीले ठेक्का लिएका कुनै पनि सडकको काम सन्तोषजनक नभएको खबर नगेन्द्र उपाध्यायको बाइलाइनमा बिहीबारको नागरिक दैनिकमा प्रकाशित छ ।
