नेपाली कांग्रेस रौतहटका नेता एवं प्रतिनिधिसभाका सदस्य (सा)सद) महम्मद आफताब आलमविरुद्ध प्रहरीले तीन वटा अभियोग लगाएको छ । अनुसन्धान सकेर प्रहरीले शुक्रबार सरकारी वकिलको कार्यालयमा बुझाएको प्रतिवेदनमा आलमलाई कर्तव्य ज्यान, ज्यान मार्ने उद्योग र बम विस्फोट गरी तीन वटा अभियोग लगाई जन्मकैद सजाय माग दाबी गरिएको छ ।
रौतहट प्रहरी कार्यालयले दिएको जानकारी अनुसार आलमकै निर्देशनमा बम बनाउन प्रत्यक्ष रुपमा मानिस परिचालन गरेको, विस्फोटपछि घाइते भएकालाई जिउँदै इँटाभट्टामा लगेर जलाएको तथा उजुरी गर्नेलाई समेत हत्या गरेको निष्कर्ष निकाली अभियोजन पत्रमा आलमलाई आजीवन कारावासको सजाय माग दाबी गरिएको हो । आलम २० दिनदेखि प्रहरी हिरासतमा छन् ।
‘हामीले अनुसन्धान पूरा गरेर सरकारी वकिलको कार्यालयमा प्रतिवेदन बुझाएका छौं, जे–जे देखियो– त्यही कुरा अनुसन्धानमा समेटेका छौं,’ रौतहटका प्रहरी प्रमुख भूपेन्द्र खत्रीले भने– ‘आलमले १२ वर्षअघि रौतहटमा इँटाभट्टाभित्र मान्छे जलाएको प्रहरी अनुसन्धानबाट पुष्टि भएको छ ।’
उनका अनुसार सो घटनामा घाइते भएका व्यक्तिहरुको बयान, प्रत्यक्षदर्शी, तत्कालीन समयमा कार्यरत सरकारी कर्मचारी तथा अन्य स्रोत समेत दसी प्रमाणको रुपमा पेस गरिएको खबर मदन ठाकुर र टपेन्द्र कार्कीको बाइलाइनमा शनिबारको नागरिक दैनिकमा प्रकाशित छ ।
