जिल्ला अदालत रौतहटले पुर्पक्षका लागि जेल चलान गर्न आदेश दिएपछि पूर्वमन्त्री तथा कांग्रेस सांसद मोहम्मद आफताब आलमले प्रहरीलाई भने– ‘म रौतहट कारागारमै बस्छु, अन्त जान्न ।’ उनलाई अन्तै राख्ने आदेश आएको जानकारी प्रहरीले गराएपछि झर्कंदै उनले फेरि भने– ‘म अन्त जान्न ।’

काठमाडौं नजाने अडान लिएका आलमलाई राति ९ बजे हत्कडी लगाएर प्रहरी निरीक्षक केदारमान दोङको नेतृत्वमा जिल्ला प्रहरी कार्यालय रौतहटले एस्कर्टीङ गाडीसहित काठमाडौं पठाएको थियो । आलम बोकेको प्रहरी टोली ७ घन्टापछि ललितपुरस्थित नख्खु कारागार आइपुगेको खबर मातृका दाहाल र शिव पुरीको बाइलाइनमा आइतबारको कान्तिपुर दैनिकमा प्रकाशित छ ।