सिंगापुरबाट शनिबार राति काठमाडौं आएको सिल्क एयरले युरोपका यात्रु पनि बोकेको भन्दै नागरिक उड्डयन प्राधिकरणले विमान फर्काउन खोज्दा यात्रुले विमानभित्रै प्रतिवाद गरे । यात्रु नओराली विमान फर्कन खोज्दा यात्रुले होहल्ला गरेपछि सबै यात्रुलाई झार्ने अनुमति प्रदान गरिएको थियो ।
नागरिक उड्डयन प्राधिकरणले सुरुमा विमान फिर्ता गर्न निर्देशन दिए पनि यात्रुको विरोधका कारण सबैलाई ओरालिएको छ । नेदरल्यान्डबाट आएका यात्रुलाई भक्तपुरको खरिपाटीस्थित क्वारेन्टाइनमा पठाइएको छ भने अन्य ९७ जनालाई सेल्फ क्वारेन्टाइनमा बस्न भन्दै राति नै विमानस्थलबाट छाडिएको खबर आइतबारको नयाँ पत्रिका दैनिकमा प्रकाशित छ ।
