केही दिनदेखि अन्तर्राष्ट्रिय उडान बन्द भएको नेपालमा मंगलबारदेखि एक साताका लागि आन्तरिक उडान समेत बन्द भएको छ । विश्वभर फैलँदो कोरोना भाइरसको संक्रमणबाट उत्पन्न अवस्थालाई मध्यनजर गर्दै सरकारले कोरोनाको उच्च जोखिमबाट बच्ने उपायस्वरुप एक साताका लागि आन्तरिक हवाई उडान समेत बन्द गर्ने निर्णय गरेको हो ।
सोमबार राजधानीमा बसेको कोरोना रोकथाम उच्चस्तरीय समितिको बैठकले मंगलबारदेखि एक साताका लागि हवाई उडान बन्द गर्ने निर्णय गरेको हो । सरकारको यस्तो निर्णयसँगै अन्तर्राष्ट्रिय हवाई उडान सुरु भएको ६ दशकपछि नेपाल पहिलो पटक राष्ट्रिय तथा अन्तर्राष्ट्रिय हवाई सम्पर्कविहीन भएको खबर बुधबारको राजधानी दैनिकमा प्रकाशित छ ।
