तराईका विभिन्न जिल्लामा कोरोना सङ्क्रमण पुष्टि हुनेहरूको संख्या ह्वात्तै बढेसँगै आ–आफ्नो गृहजिल्ला छाडेर नागरिकहरू रातारात काठमाडौं उपत्यका आउन थालेपछि थप जोखिम बढेको छ । यतिबेला तराईका जिल्लामा कोरोना विषाणुको सङ्क्रमण बढ्दै गएको छ ।
केही दिनअघि मात्र विराटनगर, वीरगञ्ज र बुटवलबाट यातायातका २४ भन्दा बढी सवारी साधन यात्रु बोकेर काठमाडौं भित्रिएका थिए । सवारी साधनका लागि नागढुङ्गा नाकामा निसङ्क्रमण टनेल निर्माण गरिएको छ । यसरी बाहिरबाट उपत्यका प्रवेश गर्नेलाई कडाइ गरिए पनि निजी तथा भाडाका सवारी साधन प्रयोग गरी विभिन्न बहाना बनाएर मध्यरातमा उपत्यका भित्रनेको सङ्ख्या दिनप्रतिदिन बढ्दै गएको बताइएको छ ।
फर्पिङ, मुड्खु, भक्तपुरको जगाती र जर्सिङपौवा नाकामा समेत टनेल राख्ने योजना बनाइएको जानकारी महानगरीय ट्राफिक महाशाखाका प्रमुख तथा प्रहरी वरिष्ठ उपरीक्षक भीमप्रसाद ढकालले दिए । निसङ्क्रमण टनेल निर्माण गर्दा यात्रु तथा सवारी केही हदसम्म सुरक्षित हुने देखिन्छ । खाद्य, तरकारी, पलफूललगायत दैनिक उपभोग्य सामग्री बोकेर आउने सवारी साधनबाट समेत कोरोना विषाणु भित्रन सक्ने भन्दै त्यस्ता सवारी साधनमाथि विशेष निगरानी बढाई डिस्इन्फेक्सन अनिवार्य गरिने भएको खबर देवबहादुर कुँवरको बाइलाइनमा सोमबारको गोरखापत्र दैनिकमा प्रकाशित छ ।
