पार्टीभित्र उत्कर्षमा पुगेको अन्तर्द्वन्द्वका बीच शनिबार बसेको सत्ताधारी नेकपाको सचिवालय बैठक, सो बैठकले तय गरेअनुसार २५ गते बस्ने स्थायी कमिटीको बैठक र स्थायी कमिटीको तयारीका निम्ति २४ गते फेरि बस्ने सचिवालयको बैठकका सन्दर्भमा सो पार्टीका वरिष्ठ नेता माधवकुमार नेपालले दाहाल र ओलीबीच ‘कस्तो चोचोमोचो भएको हो बुझ्नुपर्ने’ भन्दै आफू ‘पर्ख र हेर’ मा रहेको निकटस्थलाई बताइरहेका छन् ।
लामो समयदेखि पार्टीमा विधि, पद्धतिको कुरा उठाउँदै आएका वरिष्ठ नेता नेपालको ‘एक व्यक्ति, एक जिम्मेवारी’ को माग सम्बोधनको प्रयास यस पटक हुनेछ । नेपालले आइतबार दाहाललाई भेटेर कमजोरी सच्याउने विधि के हुने भनेर प्रश्न गरेका थिए । आफूले उठाएका मागको सम्बोधन गरी ठोस प्रस्ताव आउनुपर्ने धारणा नेपालले दाहालसँग राखेका छन् ।
दुई अध्यक्षको कार्यविभाजन मंसिर ४ कै निर्णयका आधारमा हुने भएको छ । त्यसबेला अध्यक्ष एवं प्रधानमन्त्री केपी ओलीले सरकार र अर्का अध्यक्ष पुष्पकमल दाहालले पार्टी सञ्चालन गर्ने समझदारी भएको थियो । दुई अध्यक्षबीच सोमबार प्रधानमन्त्री निवास बालुवाटारमा त्यही कार्यविभाजन कार्यान्वयन गर्ने विषयमा छलफल भएको थियो । त्यस क्रममा कार्यकारी अध्यक्षको परिभाषित जिम्मेवारीसहितको प्रस्ताव तयार पार्ने समझदारी बनेको छ । यसबारे स्थायी समितिमा छलफल गर्ने गरी प्रस्ताव तयार पार्न अध्यक्ष दाहाल र महासचिव विष्णु पौडेललाई जिम्मेवारी तोकिएको छ ।
‘स्थायी कमिटीको बैठकमा छलफलका लागि लैजाने प्रस्ताव तयार पार्ने जिम्मा अध्यक्ष दाहाल र मलाई छ । धेरै समस्याका विषय केही छैनन् । काम थालिसकेका छैनौं, थालेपछि एक चरणको बसाइमै हामी सकाइहाल्छौं’, महासचिव पौडेलले भने– ‘प्रस्तावका विषय के–कसरी तयार पार्ने भन्नेमा हामी प्रवेश गरेका छैनौं, बस्नेबित्तिकै टुंग्याइहाल्छौं ।’
दाहालनिकट एक स्थायी समिति सदस्यले पुरानै सहमतिलाई व्यावहारिक कार्यान्वयन कसरी गर्ने भन्नेमै प्रस्ट पारेर जाने गरी प्रस्ताव तयार पार्ने समझदारी दुई अध्यक्षबीच भएको बताए । ‘उहाँहरूबीच मंसिरमा सचिवालयले गरेको कार्यविभाजनकै मोडलमा फर्केर परिभाषित जिम्मेवारीलाई व्यावहारिक कार्यान्वयन गर्ने गरी ठोस प्रस्ताव अबको स्थायी समितिमा लैजाने प्रस्ताव अब तयार हुन्छ,’ ती नेताले भने– ‘त्यसकै लागि दुई अध्यक्षले छलफल गर्नुभएको छ ।’
दाहाल र पौडेलले बुधबार बिहानसम्म प्रस्ताव तयार पार्नेछन् । त्यसका लागि उनीहरू मंगलबार छलफलमा बस्नेछन् । मंसिरमा भएको सहमतिअनुसार ओली र दाहालको वरीयता यथावत् रहने, ओली प्रधानमन्त्रीको हैसियतमा सरकारको काममा केन्द्रित हुने, दाहाल कार्यकारी अधिकारसहित पार्टी काममा केन्द्रित हुने र बैठक संयुक्त अध्यक्षतामा सञ्चालन गर्ने तय छ । आम रूपमा बैठकको अध्यक्षता र सञ्चालन दाहालले गर्ने, राजनीतिक स्थायित्वको सन्देश दिन प्रतिनिधिसभाको यस कार्यकालभर सरकारको नेतृत्व ओलीले गर्ने बाँडफाँटको समझदारी भएको थियो । पार्टी र सरकार सञ्चालन अध्यक्षद्वयबीचको सल्लाहमै हुने पनि त्यसमा उल्लेख थियो ।
२० वैशाखमा सचिवालय बैठकअघि भएको छलफलमा प्रधानमन्त्री ओलीले दाहाललाई ‘तपाईं पार्टी चलाउनुहोस्, म पार्टीको निर्देशनमा सरकार चलाउँछु, पुरानै सहमतिमा फर्कौं’ भन्ने प्रस्ताव गरेपछि पार्टीको विवाद मत्थर देखिएको खबर रामकृष्ण अधिकारीको बाइलाइनमा मंगलबारको अन्नपूर्ण पोस्ट दैनिकमा प्रकाशित छ ।
