अघिल्लो साता शीतलनिवासबाट एकाएक नेकपाका वरिष्ठ नेता माधवकुमार नेपाललाई बोलावट भयो । पार्टीभित्रको अन्तर्विरोध उत्कर्षमा पुगेका बखत आएको खबरलाई मध्यनजर गर्दै राष्ट्रपति विद्यादेवी भण्डारीसँग भेट गर्न नेपाल कोटेश्वरबाट महाराजगञ्जतिर हुईंकिए ।
राष्ट्रपतिले भनिन्– ‘तपाईंलाई सबैले मध्यस्थकर्ताका रूपमा निपूण ठान्छन् । अहिले पार्टीमा देखिएको अन्तर्विरोध समाधानमा पनि त्यही अनुसार गरिदिनुपर्यो ।’ केही नबोली नेपाल सुनिरहे तर राष्ट्रपतिले थपिन्– ‘मैलेभन्दा बढी तपाईंले नै संगत गर्नुभएको र चिन्नुभएको मान्छे हो उहाँ (केपी ओलीप्रति इंगित गर्दै) । मैले पनि एक दिन यहाँबाट छाडेर जानैपर्छ ।’
त्यसपछि निर्वाचनताकाको क्षण स्मरण गर्दै राष्ट्रपतिले भनिन्– ‘तपाईंहरूले नै मलाई यो पदमा ल्याउनुभएको हो । भोलि फेरि अर्को कसैलाई पठाउनुपर्ला । त्यो अवस्थामा मैले पनि नयाँ व्यक्तिलाई राम्रोसँग हस्तान्तरण गर्न सकिनँ भने अलि मज्जा हुनेछैन । मलाई नेकपाले एकताबद्ध हुँदै जिताएर यहाँ पठाएको हो । त्यसैगरी पार्टी एक बनिरहोस् र हिजोजस्तै भोलि पनि एक भएर नेकपाकै अर्को मान्छेलाई यहाँ पठाओस् भन्ने मेरो चाहना हो ।’
नेपाललाई यो पनि भनियो– ‘पार्टी फुट्यो भने राष्ट्रपति पद समेत आगामी दिनमा अर्को पार्टीका मान्छेको हातमा जान्छ । अरुले सहजै खेल्ने मौका पाउँछन् । हिजोजस्तै भोलि पनि नेकपाले छानेको र चुनेको मान्छेलाई नै हस्तान्तरण गर्न सकूँ । पार्टीमा टुटफुट नआओस्, यही हो मेरो चाहना ।’
सत्ताधारी नेकपाका वरिष्ठ नेतासँग राष्ट्रपति विद्यादेवी भण्डारीको भलाकुसारीसम्बन्धी यो खबर बुधबारको जनआस्था साप्ताहिकमा प्रकाशित छ ।
