राज्यले गर्ने लगानी कम र स्वास्थ्य पूर्वाधार कमजोर भए पनि प्रशंसनीय कुरा— कोरोना संक्रमितको उपचार सफलतामा हालसम्म नेपाल अगाडि छ । शनिबार साँझसम्मको तथ्यांकअनुसार विश्वभर संक्रमितमध्ये ६४.२२ प्रतिशत निको भएका छन्, सार्क मुलुकमा निको भएकाको प्रतिशत ६९.८ छ, ‘ठूला’ देशमध्ये भारतमा ६८.४३ र अमेरिकामा ५१.३ प्रतिशतले कोरोना जितेका छन्, जबकि नेपालमा ७२.२ प्रतिशत निको भएर घर फर्किइसकेका छन् ।
स्वास्थ्य मन्त्रालयका अनुसार शनिबार साँझसम्म देशभर संक्रमितको संख्या २२ हजार ५ सय ९२ पुगेको छ र तीमध्ये ६ हजार २ सय ६ जना उपचारका क्रममा छन् भने १६ हजार ३ सय १३ जनाले स्वास्थ्यलाभ गरिसकेका छन् । मुलुकमा कोरोना संक्रमण ह्वात्तै बढे पनि निको हुनेको संख्या पनि उल्लेख्य छ । संक्रमणमुक्त भई पछिल्लो २४ घन्टामा डिस्चार्ज हुने ४ सय ९९ जना छन् । यहाँसम्म आइपुग्दा संक्रमितभन्दा डिस्चार्ज हुनेको संख्या बढी भइसकेको छ । केहीअघिसम्म भने निको हुनेभन्दा संक्रमित बढी थिए ।
असार १ मा १ हजार ४१ संक्रमित निको भई डिस्चार्ज भएका थिए । त्यसको दुई साताभित्र निको हुनेको संख्या दोब्बर वृद्धि भएको थियो । असार १५ गते ३ हजार १ सय ३४ जना घर फर्किएको स्वास्थ्य मन्त्रालयले जनाएको छ । असार २८ सम्ममा ८ हजार १ सय ४७ जना संक्रमणपछि डिस्चार्ज भएका थिए, जबकि त्यस दिनसम्म सक्रिय संक्रमितको संख्या ८ हजार ५ सय ८९ थियो ।
कुनै न कुनै स्वास्थ्य समस्या भएका र पहिलादेखि नै औषधि सेवन गरिरहेका व्यक्तिको मात्र कोरोना संक्रमणपछि ज्यान गएको शुक्रराज ट्रपिकल तथा सरुवा रोग अस्पतालका निर्देशक डा. सागरकुमार राजभण्डारीले बताएको खबर दिनेश गौतमको बाइलाइनमा आइतबारको अन्नपूर्ण पोस्ट दैनिकमा प्रकाशित छ ।
