पण्डित माधवप्रसाद शर्मालाई संक्रमणबीच ‘संस्कार जोगाउने’ पिरलोले सताउन थाल्दैछ । नजिकिँदो ‘सोह्रश्राद्ध’ ले त झन् नपिरोल्ने कुरै भएन । १७ भदौदेखि सोह्र श्राद्ध सुरु हुँदैछ ।
‘संक्रमणबाट जोगिनु पनि पर्यो, संस्कार पनि धान्नै पर्यो,’ पण्डित शर्माले सुनाए– ‘घरघर जाँदा संक्रमण सर्ने र फैलने उत्तिकै खतरा छ, यसो भएपछि श्राद्धमा पनि भर्चुअल (अनलाइन प्रविधि) को सहायता लिनुपर्ने अवस्था छ ।’ जजमान र पुरोहित आ–आफ्नै घरमा बसेर भर्चुअल श्राद्ध गर्न सकिने उनको धारणा छ ।
पण्डित शर्माका अनुसार ‘भर्चुअल श्राद्ध’ मा ब्राह्मणबाट संकल्प र मन्त्रोच्चारण हुन्छ, अर्कातिर जजमान कुशको ‘ब्राह्मण’ स्थापना गरी टीका लगाइदिन्छन् । सोह्र श्राद्ध आउन एक साता मात्र बाँकी छ । पितृ स्मरण गर्दै जल र अन्नसहित श्राद्ध गरिन्छ । कोरोनाका कारण पहिलेजस्तो नातागोता भेला गरेर श्राद्ध गर्ने स्थिति छैन । श्राद्ध रोक्ने कुरा पनि भएन । यसअघि ब्राह्मण जजमानका घर पुग्थे । एकातर्फ पितृ स्मरणसहित संस्कृति धान्न श्राद्ध गर्नैपर्ने बाध्यता र अर्कोतर्फ स्वास्थ्यको ख्याल राख्नुपर्ने चुनौती आइपरेको छ ।
विज्ञका अनुसार संक्रमण फैलाउन ‘एकै व्यक्ति पनि काफी’ हुन्छन् । सोह्र श्राद्ध प्रतिपदादेखि औंसीसम्म एकै ब्राह्मणले धेरै घरमा गई श्राद्ध गराइदिन्छन् । संक्रमणकालीन अवस्थामा ‘सकेसम्म एक जना ब्राह्मण मात्र बोलाएर श्राद्ध गर्न नेपाल पञ्चांग निर्णायक समितिका अध्यक्ष एवं धर्मशास्त्रविद् प्रा.डा. रामचन्द्र गौतमले आग्रह गरेको खबर नवीन लुइँटेलको बाइलाइनमा शुक्रबारको राजधानी दैनिकमा प्रकाशित छ ।
