एमालेको ओली समूहलाई चुनौती दिँदै समानान्तर समिति गठन गरिरहेको झलनाथ खनाल–माधवकुमार नेपाल पक्षसँग एकताको सम्भावना करिव–करिव सकिएको निष्कर्ष अध्यक्ष खड्ग ओली पक्षले निकालेको छ । पार्टीभित्र आन्तरिक संघर्षमा जुटेको खनाल–नेपाल पक्षका पछिल्ला अभिव्यक्ति र गतिविधिले गर्दा एकता कायम राख्नुको औचित्य नभएको र त्यसको सम्भावना पनि टरेको ओली समूहको विश्लेषण छ ।
‘माधव नेपालले पछिल्लो समयमा जुन अभिव्यक्ति दिनुभएको छ, त्यसले पार्टी एकता कायम रहन्छ भन्ने सोच्न पनि सकिन्न, उहाँकै कारण हजारौं नेता–कार्यकर्ताको राजनीतिक भविष्य अन्योलमा पर्दैछ,’ ओली समूहका एक नेताले भने । उनका अनुसार पार्टी एकताको पक्षमा धेरै काम गरिए पनि नेपाल पक्षका नेताले पछिल्ला दिनमा जे–जस्ता गतिविधि गरेका छन्, त्यो बिल्कुलै पार्टी हितविपरीत भएकाले आन्तरिक छलफलका क्रममा अध्यक्ष ओलीले अब सहकार्य असम्भवजस्तै रहेको बताउन थालेका छन् ।
यसबाट एमाले मिलाउनुपर्छ भनेर लागेका दुवै पक्षका सम्पर्क सूत्र पनि निराश भएका छन् । ‘माधव नेपाल र ओली मिलेमा कम्युनिस्ट आन्दोलनले एउटा उचाइ लिन्छ, त्यसका लागि पहिलो चरणमा एमाले एकताबद्ध हुनु आवश्यक छ,’ बालुवाटार र कोटेश्वरबीच सम्पर्क सूत्रको काम गरिरहेका एक नेताले भने ।
एकताका लागि गरिएका कोसिस असफल हुँदै गएपछि दुवैतिरका सम्पर्क सूत्र दुई–तीन दिनयता निराश देखिएका छन् । नेपाल पक्षले समानान्तर कमिटी बनाउन थालेपछि उनी पक्षका र ओली पक्षका अत्यन्त विश्वासपात्रका रूपमा रहेका नेताहरूले दुवैतिर सम्पर्क सूत्रको काम गर्दै आएकामा अब भने उनीहरू समेत निराश भैसकेको खबर बिहीबारको नागरिक दैनिकमा प्रकाशित छ ।
