जनता समाजवादी पार्टी (जसपा) को महन्थ ठाकुर–राजेन्द्र महतो पक्ष खड्ग ओली नेतृत्वको कामचलाउ सरकारमा सहभागी हुने निश्चित भएपछि बाबुराम भट्टराई–उपेन्द्र यादव पक्षका केही सांसद तथा नेता ठाकुर–महतो पक्षमा लागेका छन् । ५ सांसद ठाकुर पक्षमा पुगेपछि उपेन्द्र यादव पक्षका १२ जना सांसदले मात्र शेरबहादुर देउवालाई प्रधानमन्त्रीमा प्रस्ताव गर्दै सोमबार हस्ताक्षर गरेका थिए ।
‘सरकारमा जाने लोभ’ नै पाँच सांसदले कित्ता परिवर्तन गर्नुको प्रमुख कारण भएको देखिएको छ । यसरी कित्ता परिवर्तन गरी ठाकुर पक्षमा पुग्ने सांसदहरू उमाशंकर अरगरिया, विमल श्रीवास्तव, रुही नाथ, कल्लुदेवी विश्वकर्मा र रेणुका गुरुङ हुन् । ठाकुर पक्ष सरकारमा जाने निश्चित भएपछि नै उनीहरूले कित्ता परिवर्तन गरेको स्रोतको भनाइ छ ।
ठाकुर–महतो पक्षले वैशाखमा भक्तपुरको डोेलेश्वरमा गरेको बैठकमा जसपाका २० सांसद उपस्थित भएको दाबी गरिएको थियो । त्यस बैठकमा उपेन्द्र यादव पक्षका कुन–कुन सांसद सहभागी थिए भन्ने खुलेको थिएन । स्रोत भन्छ– ‘डोलेश्वर बैठकमा यादव पक्षका श्रीवास्तव र अरगरिया खुलेर आएका थिए, अरू ३ सांसदले भने आउने आश्वासन दिएका थिए तर नाम खुलाउन चाहेका थिएनन्; अहिले भने उनीहरूले खुलेरै कित्ता परिवर्तन गरेका छन् ।’
यादव पक्षका ५ सांसदले कित्ता परिवर्तन गरेपछि महतोलाई संसदीय दलको नेता चयन गर्ने निर्णयमा २० सांसदको हस्ताक्षर रहेको स्रोतको भनाइ छ । संसदीय दलमा ठाकुर–महतो पक्ष बहुमतमा रहे पनि कार्यकारिणी समितिमा भने आफूहरू बहुमतमा रहेको यादव पक्षका नेताहरूको दाबी छ । जेठ ८ र ९ को कार्यकारिणी समितिको बैठकमा अत्यधिक बहुमत सदस्य उपस्थित रहेको यादव पक्षको दावी छ ।
यसैबीच, ठाकुर–महतो पक्षले सरकारमा जाने निर्णय गरेको छ । जसपा स्रोतका अनुसार सरकारमा सहभागी हुन ठाकुर र महतोले कामचलाउ प्रधानमन्त्री खड्ग ओलीलाई जानकारी समेत गराइसकेका छन् । ‘जसपाले राखेका माग पूरा गरेको’ भन्दै उनीहरू सरकारमा जान लागेका हुन् । सरकारले जन्मसिद्ध नागरिकका सन्तानलाई वंशजको आधारमा नागरिकता दिने तथा संविधान संशोधनका लागि कार्यदल गठन गर्ने निर्णय गरेको छ ।
जसपाले सरकारसँग ५ वटा माग राखेको थियो, सरकारले पूरा गर्न बाँकी अब २ माग मात्र छन्– रेशम चौधरीको रिहाइ र लाल आयोगको प्रतिवेदन सार्वजनिक गर्नुपर्ने । यी माग पनि तत्काल पूरा गर्ने आश्वासन ओलीले दिएको जसपाका नेताहरूले जनाएका छन् ।
आफूहरू सरकारमा जाने सम्भावना बढेको ठाकुर पक्षका नेता शरतसिंह भण्डारीले बताए । ‘हाम्रा माग र मुद्दा सम्बोधन भएमा सरकारमा जान्छौं भन्दै आएका छौं, माग र मुद्दा सम्बोधन हुने क्रममा छन्।’ भण्डारीले भने– ‘त्यसैले सरकारमा जाने सम्भावना बढेको छ ।’ विभाजोन्मूख जसपाको विवाद र आन्तरिक समीकरणसम्बन्धी यो खबर बिहीबारको नागरिक दैनिकमा प्रकाशित छ ।
