कोरोनाभाइरसबाट बढी सङ्क्रमित भएको भनिएको चीनको हुबेइ प्रान्तको वुहानमा एकै दिनमा २४२ जनाको मृत्यु भएको बिहीबार प्राप्त समाचारमा जनाइएको छ ।
वुहानबाटै सन् २०१९ को अन्त्यतिरबाट यसको सङ्क्रमण सुरु भएको थियो । यस भाइरसबाट हुने सङ्क्रमणलाई हालै मात्र वैज्ञानिकहरुले ‘कोभिड– १९’ नाम दिएका छन् । प्रतिदिन यस रोगको प्रकोप फैलिएसँगै एकै दिनमा मृत्यु हुनेको सङ्ख्यामा पनि वृद्धि भइरहेको छ । पछिल्ला केही दिनमा नयाँ सङ्क्रमण हुने मानिसको सङ्ख्यामा ठूलो मात्रामा वृद्धि भएको छ ।
वुहानमा मात्र थप १४ हजार ८ सय ४० जनामा यस भाइरसको सङ्क्रमण भएको पुष्टि भएको छ । बुधबार भएको मृत्युसँगै मृतकहरूको कूल सङ्ख्या १ हजार ३ सय ५० पुगेको चिनियाँ अधिकारीहरुले जानकारी दिएका छन् । उनीहरुका अनुसार पछिल्लो समयमा निको भएर फर्किएका बाहेक हाल सङ्क्रण भई उपचार गराइरहेका बिरामीको सङ्ख्या झन्डै ६० हजार पुगेको छ ।
यस सङ्क्रमणको उपचारका क्रममा कुनै कमी हुन नदिने चिनियाँ कम्युनिस्ट पार्टीले जनाएको छ । पार्टीले हुबेइ प्रान्तका सचिवलाई हटाएको बताइएको छ । उक्त पार्टीले त्यस स्थानमा चीनको साङ्घाइका पार्टी प्रमुखलाई पठाएको चिनियाँ सरकारी सञ्चार माध्यमहरुले जनाएका छन् । केही दिनअघि मात्र पनि सरकारले स्वास्थ्य सेवाबाट केही अधिकारीहरूलाई पदमुक्त गरेको थियो ।
स्वास्थ्य अधिकारीहरुले दिएको जानकारी अनुसार चीनमा सङ्क्रमित बिरामीहरुमध्ये करिव ८० प्रतिशत हुबेइ प्रान्तका मात्र रहेको नयाँ तथ्य पनि पत्ता लागेको छ । यस सङ्क्रमणबाट वुहानमा ज्यान गुमाएका २ सय ४२ जनामध्ये १ सय ३५ मा त्यसरी नै रोगको पुष्टि गरिएको थियो । यस प्रान्तमा मात्र सङ्क्रमण भएका व्यक्तिको सङ्ख्या हालसम्म ४८ हजार २ सय ६ पुगेको चिनियाँ स्वास्थ्य अधिकारीहरुले जानकारी दिएका छन् ।
विश्व स्वास्थ्य सङ्गठनले चीनमा देखा परेको उक्त प्रकोपलाई अति सावधानीपूर्वक लिनुपर्ने धारणा राखेको छ । जेनेभामा आयोजित एक कार्यक्रममा सङ्गठनका प्रमुख टेड्रोस एड्हानोम गेहब्रेयससले यसबारे भ्रम फैलाउँदा त्यसले प्रकोप न्यूनीकरणमा असर पर्ने भन्दै यस प्रकोपलाई अति सावधानीपूर्वक लिनुपर्ने बताएका हुन् ।
