आफूलाई गृह मन्त्रालयको बहालवाला सहसचिव बताउँदै साढे पाँच करोड रुपैयाँ ठगी गर्ने गौर– १, रौतहटका ५७ वर्षीय सत्येन्द्र यादवलाई प्रहरीले पक्राउ गरेको छ ।
महानगरीय प्रहरी परिसर काठमाडौंबाट खटिएको प्रहरी टोलीले उनलाई तारकेश्वर नगरपालिका, पाँचपानेस्थित एक रिसोर्टबाट पक्राउ गरेको हो । प्रहरीका अनुसार उनले क्यानडा लैजाने भन्दै ७० जनाभन्दा धेरै युवासँग रकम असुलेका थिए । परिसरमा ६ जनाले जाहेरी दिएपछि यादवलाई पक्राउ गरिएको प्रवक्ता डीएसपी होवीन्द्र बोगटीले बताए ।
डीएसपी बोगटीका अनुसार यादवले ६ जनाबाट मात्रै १ करोड ८४ लाख रुपैयाँ असुल गरेका थिए । बोगटीले भने– ‘क्यानडा लैजाने भन्दै थुप्रै युवासँग रकम असुलेको देखियो । प्रतिव्यक्ति ५ लाख देखि १५ लाख रुपैयाँसम्म असुल गरेको जाहेरी परेको छ । सोही जाहेरीपछि उनलाई पक्राउ गरिएको हो । पीडितको बयानअनुसार यादवले साँढे ५ करोड रुपैयाँ ठगी गरेका छन् ।’
सत्ता–शक्तिको भ्रममा पार्दै ठगी गर्ने प्रवृत्तिको पछिल्लाे उदाहरणसम्बन्धी यो खबर टेकराज थामीको बाइलाइनमा मंगलबारको नयाँ पत्रिका दैनिकमा प्रकाशित छ ।
