सुत्केरी गराउन एक साताअघि अस्पताल आएकी उनको त्यहाँ कुनै उपचारको सुरुवात नै गरिएन । त्यसपछि आफन्तले २० हजार रूपैयाँ भाडा तिरेर उनलाई एम्बुलेन्समा नेपालगञ्ज लगे ।

त्रिवेणी गाउँपालिका– ५ की विष्णुकला घर्तीलाई पनि सुत्केरी बेथा सुरु भयो । बेथा सुरु भएको दुई दिनसम्म पनि उनको बच्चा नजन्मिएपछि आफन्तले जिल्ला अस्पताल सल्ले ल्याए तर उनको पनि त्यहाँ उपचार सुरु गरिएन ।

त्यसपछि आफ्न्तले २० हजार रूपैयाँ भाडा तिरेर एम्बुलेन्समा उनलाई कोहलपुर लगे । यी त केही प्रतिनिधि घटना मात्र हुन् । दुई महिनादेखि जिल्ला अस्पताल सल्लेमा सुत्केरी हुन आउने सबै महिलाले यस्तै समस्या व्यहोर्नु परेको छ ।

जिल्ला अस्पतालमा सुत्केरी हुन आउने जटिल अवस्थाका महिलालाई सुत्केरी हुन दाङ वा नेपालगञ्ज जानुपर्ने बाध्यता छ । एक महिनामा ९० जनाभन्दा बढी महिला सुत्केरी हुन अस्पतालमा आउने गरेको भए पनि तीमध्ये १० देखि १५ जनासम्म जटिल अवस्थाका हुुने गर्छन् ।

सुत्केरी हुन आउने अलिकति जटिल अवस्थाका महिला जिल्ला बाहिर उपचार गर्न जानुपर्ने बाध्यता रहको बिरामीको गुनासो छ । साउन र भदौ को १९ सम्म सुत्केरी हुन अस्पताल आएका ९९ जना गर्भवती महिलामध्ये ७९ जनाले मात्रै अस्पतालको प्रसूतिगृहबाट सेवा पाएका छन् ।

जटिल अवस्थामा अस्पताल पुगेका २० जना महिला भने सुत्केरी हुन दाङ वा नेपालगन्ज गए । जिल्ला अस्पतालका अनुसार साउनमा १५ र भदौको हालसम्म ५ जना गर्भवती महिलालाई जटिल अवस्था देखिएकै कारण शल्यक्रियाका लागि जिल्लाबाहिर पठाएको छ ।

सुत्केरी गराउन जिल्लाबाहिर जानुपर्दा प्रत्येकले १५ देखि २० हजार रूपैयाँसम्म एम्बुलेन्सको भाडा तिर्नुपर्ने हुन्छ । उनीहरु एम्बुलेन्स भाडा तिरेर सुत्केरी हुन दाङ वा नेपालगन्ज जाने गरेका छन् ।

आर्थिक वर्ष २०७३/७४ को अन्त्यसम्ममा जटिल अवस्थाको शल्यक्रिया जिल्ला अस्पतालमै हुने गर्दथ्यो । सो आ.व.को अन्त्यतिर प्रसूति शल्यक्रियाका चिकित्सकले जागिर छाडेपछि जिल्लावासी समस्यामा परेका हुन् ।

प्रसूतिगृहमा कार्यरत स्वास्थ्यकर्मीले थोरै जटिल देखे पनि सुत्केरीका लागि नेपालगञ्ज रेफर गर्ने गरेको बिरामीको भनाइ छ । ‘यहाँ शल्यक्रिया हुन छाडेको दुई महिना पुग्नै लाग्यो’, त्यहाँ कार्यरत एक स्वास्थ्यकर्मीले भने– ‘रिस्क मोल्नुभन्दा रेफर गर्ने गरेका छौं ।’

जिल्ला अस्पताल प्रमुख डा. सविन पोखरेलले विशेषज्ञ चिकित्सक नभएपछि जटिल अवस्थाका सुत्केरी गराउन समस्या परेको बताए । ‘थप सेवा गर्न आग्रह गर्दागर्दै पनि चिकित्सकले जागिर छाडेर जानुभयो’, उनले भने– ‘अब हामी जतिसक्दो छिटो नयाँ विशेषज्ञ चिकित्सक ल्याउने पक्षमा छौं, चिकित्सक आउनेवितिकै समस्या समधान हुन्छ ।’