निर्मला पन्तको बलात्कारपछि हत्या गरिएको घटना छानबिनका लागि गठित उच्चस्तरीय समितिले अपराधीबारे ठोस कुरा बाहिर ल्याउला भन्ने उनकी आमा दुर्गादेवीले आस गरेकी थिइन् ।
समितिका सदस्यले समेत अपराधी किटान गरेरै प्रतिवेदन सार्वजनिक नगर्दा उनका यी सबै आशा निराशामा बदलिए । ‘प्रतिवेदन चित्तबुझ्दो छैन, पुरानै कुरा आए, न अपराधी पत्ता लाग्यो न त प्रमाण ढाकछोप गरी नष्ट गर्नेहरु नै किटान गरिए,’ दुर्गादेवीले भनिन्– ‘प्रतिवेदनमा भएका कुरा त हामीले सुरुदेखि भन्दै आएका छौं, के नै नयाँ आएको छ र !’
प्रहरी र बम दिदीबहिनीमाथि फेरि अनुसन्धान गर्नुपर्ने कुरा प्रतिवेदनमा उल्लेख भए पनि प्रहरीबाट मात्रै हुने अनुसन्धानमा विश्वास नभएको उनले बताइन् । विगतमा पनि बम दिदीबहिनी रोशनी र बबितालाई २५ दिनसम्म हिरासतमा राखेर छाडिएको थियो ।
‘बम दिदीबहिनीसँग बयान लिँदा अधिकारकर्मीलाई पनि साक्षी राख्नुपर्छ,’ दुर्गाले भनिन्– ‘प्रहरीले लिने बयान तथा अनुसन्धान चित्तबुझ्दो छैन ।’ आइतबार सार्वजनिक गरिएको प्रतिवेदनमा ठोस रुपमा कसको के कमजोरी हो भन्ने कुरा नआएको उनले बताएको खबर मंगलबारको कान्तिपुर दैनिकमा प्रकाशित छ ।
