३८ क्विन्टल सुन तस्करी तथा सनम शाक्य हत्या मुद्दाका एक मुख्य अभियुक्त बेनु श्रेष्ठलाई नेपाल प्रहरीले संयुक्त अरब इमिरेट्सबाट पक्रेर नेपाल ल्याएको छ ।
श्रेष्ठलाई आइतबार नेपाल ल्याइएको हो । अन्तर्राष्ट्रिय प्रहरी अपराध संगठन (इन्टरपोल) मा ‘रेड नोटिस’ जारी गरिएका श्रेष्ठलाई पक्राउ गरेर ल्याउने प्रहरीको प्रयास लामो समयपछि सफल भएको हो ।
श्रेष्ठलाई जिल्ला प्रहरी कार्यालय मोरङमा पठाउने तयारी गरिएको छ । श्रेष्ठ दुबईमा बसेर सुन र हुन्डीको कारोबार संलग्न व्यक्ति हुन् । उनले त्यहाँबाट नेपालमा सुन पठाउने काम गर्थे ।
‘रेड नोटिस’ जारी गरेपछि युएईको प्रहरीले उनलाई पक्राउ गरेर तारेखमा छाडेको थियो । दुई देशबच सुपुर्दगी सन्धि नभएका कारण युएईले उनलाई निष्काशन गरी नेपाललाई हस्तान्तरण गरेको हो ।
सुन तस्करका मुख्य नाइके चूडामणि उप्रेती ‘गोरे’ का भाइ रमेश उप्रेती पनि दुबईमा पक्राउ परिसकेका छन् । उनलाई पनि नेपाल ल्याउने प्रक्रिया अगाडि बढाइएको छ ।
उता, सुन तस्करी प्रकरणमा फरार रहेका व्यवसायी ठाकुर ढुंगानाले भने अदालतमा आत्मसमर्पण गरेका छन् । उनलाई मोरङ जिल्ला अदालतले १० लाख रुपैयाँ धरौटीमा छाड्ने आदेश दिएको छ ।
यसअघि नेपालले गोरेसहित १३ जनाविरुद्ध ‘रेड नोटिस’ जारी गरेको खबर सोमबारको नयाँ पत्रिका दैनिकमा प्रकाशित छ ।
