गणतन्त्रको स्थापनापछि नेपालमा हरेक क्षेत्रमा ३३ प्रतिशत महिला सहभागिताको बहस चल्यो ।
अन्ततः गणतान्त्रिक संविधानले नै ३३ प्रतिशत महिला सहभागितालाई सुनिश्चित गर्यो । तर, संविधानले तोकेको व्यवस्था संविधान–पालकहरुले नै कार्यान्वयन गरेका छैनन् ।
वर्तमान गणतन्त्रमा पनि महिलालाई सकेसम्म पहुँचमा पुग्नबाट रोक्ने प्रयास भएको देखिन्छ । प्रजातन्त्रदेखि गणतन्त्रसम्म करिव १ हजार ५ सय पुरुषहरु मन्त्री बन्दा महिलाबाट मन्त्री बन्नेको संख्या भने ७२ मात्रै छ ।
महिलाबाट देशकै पहिलो मन्त्री द्वारिकादेवी ठकुरानी १३ जेठ, २०१६ मा पहिलो जननिर्वाचित प्रधानमन्त्री बीपी कोइराला नेतृत्वको सरकारमा एक मात्र महिला मन्त्री बनेकी थिइन् । २००७ देखि २०७५ सम्म मन्त्री बनेका महिलाहरुबारेको विस्तृत खबर आइतबारको नयाँ पत्रिका दैनिकमा प्रकाशित छ ।
