राष्ट्रिय ध्वजावाहक नेपाल वायुसेवा निगमको पहिलो वाइड बडी विमान ‘अन्नपूर्ण’ दुई हप्तादेखि ‘ग्राउन्डेड’ छ ।
‘ब्रेक सिस्टम’ बिग्रिएपछि ये विमान त्रिभुवन अन्तर्राष्ट्रिय विमानस्थलमा ग्राउन्डेड भएको हो । विमानको ब्रेक सिस्टममा तीन वर्षको वारेन्टी भए पनि तीन महिना नउड्दै समस्या आएको निगमले जनाएको छ ।
एन–एएलवाई ‘कलसाइन’ रहेको यो विमानको ब्रेक सिस्टम बिग्रिएपछि नउडाइएको निगमका प्रवक्ता अशोक सिग्देलले बताए । उनका अनुसार नयाँ वाइड बडी खरिदका क्रममा भएको सम्झौता अनुसार बिग्रनु नपर्ने ब्रेक सिस्टम कसरी बिग्रियो भन्ने विषयमा अहिले अध्ययन भइरहेको छ ।
‘कात्तिक २२ गते जहाजको ब्रेक सिस्टममा खराबी देखिएपछि विमानस्थलमै ग्राउन्डेड गरेका छौं, प्राविधिक विषय भएका कारण इन्जिनियरहरुले अध्ययन गरिरहेका छन्,’ सिग्देलले भने– ‘एभियोनिक्स कार्गो डोरमा समेत समस्या देखिएको छ, केही दिनभित्रै हल हुन्छ ।’
दोहा–काठमाडौं उडानका क्रममा कातिक १६ गते दोहामा विमानको ब्रेक सिस्टममा समस्या देखिएपछि ६ घन्टा उडान रोकिएको खबर बिहीबारको नागरिक दैनिकमा प्रकाशित छ ।
