श्रीमानको मृत्युपछि श्रीमतीले रातो लगाउनु नहुने ‘मान्यता’ हाम्रो समाजमा अझै कायम छ ।
तर, धादिङको थाक्रे गाउँपालिकाका एकल महिलाले यो रुढिवादी संस्कार तोड्दै सामूहिक रुपमा रातो टीका र लुगा लगाएका छन् ।
श्रीमानको निधनपछि सेतो मात्रै लगाएर बस्नुपर्ने परम्पराका कारण अपहेलित हुनु परेकाले सबै महिला एक ठाउँमा भेला भएर रातो लगाइएको स्थानीय गोमा तामाङले बताइन् ।
‘समाजको नकारात्मक सोच हटाउन एकल महिला एक भएर अग्रसर हुनु जरुरी छ,’ उनले भनिन्– ‘श्रीमानलाई गुमाउनु पर्दाको पीडा बिर्साउन र समाजमा सम्मानपूर्वक बाँच्न हामी रातो पहिरनमा सजिएका छौ ।’
श्रीमानको मृत्युपश्चात् चुरा–पोते, सिन्दुर, टीका र रातो कपडा लगाउनुहुन्न भन्ने कुप्रचलनविरुद्ध यहाँका महिला जुर्मराएको खबर बुधबारको नागरिक दैनिकमा प्रकाशित छ ।
