बाँकेको विकट नरैनापुर गाउँपालिका– १, मतनियाँका ५१ वर्षे नुर मोहम्मद खाँले एकै दिन तीन पत्नीसँग सम्बन्ध–विच्छेद गरेका छन् ।
देशभरि महिला हिंसाविरुद्धको १६ दिने अभियान चलेकै दिन ९ मंसिरमा खाँले तीन पत्नीलाई ‘तलाक’ दिएका हुन् ।
खाँले तीनै जना श्रीमतीलाई सम्बन्ध–विच्छेद दिएको नरैनापुर गाउँपालिकाका अध्यक्ष इस्तियाक अहमद शाहले पुष्टि गरे। ‘दुई वटी पत्नी हुँदाहुँदै तेस्रो बिहे गरेपछि ऊ एक दिन प्रहरी थुनामा पर्यो,’ शाहले भने– ‘चौकीबाट छुटेर आएको अर्को दिन तीन वटै पत्नीलाई तलाक दिएको हो ।’
खाँका जेठी र माइली पत्नीबाट ६–६ वटा गरी १२ सन्तान छन् । उनले कात्तिकको दोस्रो साता आफूभन्दा आधा उमेरकी २२ वर्षीया भान्जी सिराजुन निशा जोलाहिनसँग ‘प्रेमविवाह’ गरेको खबर मंगलबारको अन्नपूर्ण पोस्ट दैनिकमा प्रकाशित छ ।
