पार्टीका पूर्वसंयोजक उज्वल थापा समूहले नियोजित रुपमा पार्टी फुटाएको आरोप विवेकशील साझा पार्टी (रवीन्द्र मिश्र पक्ष) ले लगाएको छ ।
विवेकशील साझाका प्रवक्ता डा. सूर्यराज आचार्यद्वारा मंगलबार जारी विज्ञप्तिमा थापाले केन्दीय समितिको बैठक हुनुभन्दा पहिले नै नयाँ पार्टीको दर्ता प्रक्रिया सुरू गरेर छापामार शैलीमा पार्टी फुटाएको उल्लेख छ ।
विवेकशील साझाको केन्द्रीय समितिले पछिल्लो अवस्थालाई अनपेक्षित र दुःखद घटनाका रुपमा मूल्यांकन गर्दै पूर्ण समीक्षात्मक रिपोर्ट तयार पार्न पार्टीका संयोजक रवीन्द्र मिश्रलाई जिम्मा दिने निर्णय गरेको छ ।
पार्टीमा घटेका पछिल्ला घटनाहरु र अन्य समस्याहरुबारे केन्द्रीय समितिको बैठकमा छलफल भएको बताइएको खबर बुधबारको नागरिक दैनिकमा प्रकाशित छ ।
