नेपाल कम्युनिस्ट पार्टी (नेकपा) को एकीकरण कार्यदलभित्रै चर्को असन्तुष्टि देखिएको छ ।
व्यक्तिगत स्वार्थपूर्तिका लागि पार्टी नेतृत्वलाई प्रयोग गर्नेहरूले कार्यदल असफल भएको प्रचार गराएको भन्दै कार्यदलकै नेताहरू असन्तुष्ट भएका हुन् ।
‘हामीले संयोजकलाई काम सम्पन्न गरेर प्रतिवेदन बुझाउनका लागि छिटो बैठक डाक्नुपर्यो भनेको भन्यै छौं, डाक्छु भन्नुभएको छ तर अहिलेसम्म बोलाउनुभएको छैन,’ कार्यदलका सदस्य योगेश भट्टराईले भने– ‘सहज ढंगले काम गर्न दिने हो भने एक–दुई दिनमै प्रतिवेदन तयार पारेर बुझाउन सकिन्छ । तर, कार्यदललाई काम गर्नै नदिएर शीर्ष नेतृत्वलाई खुसी पार्ने, गलत ढंगले प्रयोग गरेर व्यक्तिगत स्वार्थ पूर्ति गर्न चाहनेले अहिले कार्यदल असफल भएको नियोजित प्रचार गराइरहेका छन् ।’
कार्यदल कार्यादेश पूरा गर्न असफल नभएको दाबी गर्दै अध्यक्ष ओली र प्रचण्डसहित पार्टीलाई असफल पारेर व्यक्तिगत स्वार्थ पूरा गर्न चाहने केहीले कार्यदललाई सहज ढंगले काम गर्न नदिएको दाबी उनले गरे । ९ सदस्यीय एकीकरण कार्यदलमा रामबहादुर थापा ‘बादल’ संयोजक छन् ।
पटक–पटक बैठक बोलाउन ध्यानाकर्षण गराउँदा पनि आफू व्यस्त रहेको जानकारी गराएर बादलले भेटै नदिने र पन्छाउने गरेको कार्यदलकै अर्का एक सदस्यले बताए । यद्यपि, यस अघिका कतिपय बैठक महासचिव विष्णु पौडेलले पनि बोलाउने गरेकामा उनी पनि सम्पर्कमा नरहेको केही नेताहरुको आरोप छ ।
बिहीबार बैठक राख्ने ‘आश्वासन’ !
बैठक नबोलाइएकामा आक्रोशित सदस्यहरूलाई बिहीबार बैठक राख्ने आश्वासन बादलले दिएका छन् । सांसदहरू योगेश भट्टराई, लेखराज भट्ट र सुरेन्द्र पाण्डेसँग बुधबार संसद् भवन नयाँ बानेश्वरमा भएको अनौपचारिक संवादमा बिहीबार दिउँसो २ बजे बैठक बस्ने आश्वासन बादलले दिएको एक सदस्यले बताएको खबर शुरोजंग पाण्डेको बाइलाइनमा बिहीबारको नयाँ पत्रिका दैनिकमा प्रकाशित छ ।
