अफगानिस्तानको दक्षिणी प्रान्त फर्याबको कैसार जिल्लामा लुकेर बसेका तालिबान लडाकुलक्षित सरकारी सुरक्षा बलले गरेको कारबाहीमा परी १७ लडाकु मारिएको अफगान सेनाका प्रवक्ता मोहम्मद हानीफ रेजाईले जानकारी दिएका छन् ।
सरकारी सुरक्षा बलले गरेको हवाई र स्थल कारबाहीमा तालिबान लडाकुका कमान्डर मवलावी इस्माट इस्माटयारसहित १७ तालिबान लडाकुको घटनास्थलमै मृत्यु हुनुका साथै अन्य ८ घाइते भएका रेजाईले बताएका छन् । यस सुरक्षा कारबाहीको क्रममा ३ सुरक्षा अधिकारीहरुले पनि ज्यान गुमाएको र अन्य ४ सुरक्षा अधिकारी सामान्य घाइते भएको सरकारी स्रोतले जानकारी दिएको छ । यस कारबाहीको तालिबान विद्रोही समूहले भने कुनै टिप्पणी गरेको छैन ।
त्यसैगरी, अफगानिस्तानको दक्षिण प्रान्त जाबुलमा सुरक्षा अधिकारीहरु र तालिबान लडाकुहरुबीच भएको झडपमा १४ लडाकु मारिएका छन् । यस झडपमा १७ जना घाइते भएका छन् । सो इलाकामा लुकेर बसेका तालिबान लडाकुविरुद्ध सरकारी सुरक्षा बलले जारी राखेको सुरक्षा कारबाहीका क्रममा यो झडप भएको बताइएको छ ।
यस कारबाहीका क्रममा सुरक्षाबल र सर्वसाधारण नागरिकतर्फ भने कुनै हताहती नभएको सुरक्षा बलद्वारा जारी विज्ञप्तिमा बताइएको छ । जाबुल प्रान्तका केही भागमा अशान्ति मच्चारहेका तालिबान समूहले भने यस विषयमा कुनै टिप्पणी गरेका छैनन् ।
