नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीसँग औपचारिक वार्ताविनै सेना–प्रहरी परिचालन गरेर ‘नियन्त्रण’ मा लिन खोज्नु मुलुकका लागि घातक हुन सक्ने चेतावनी पूर्वप्रधान सेनापति राजेन्द्र क्षत्रीले दिएका छन् ।
नेकपामाथि ‘प्रतिबन्ध’ लगाइएपछि त्यसको पक्ष र विपक्षमा अभिव्यक्ति आइरहेका बेला केही महिनाअघि मात्रै अवकाश पाएका नेपाली सेनाका पूर्वप्रधान सेनापति क्षत्रीले अहिले सरकारले चालेको कदमको आलोचना गरेका हुन् ।
भदौ २४ मा अवकाश पाएका पूर्वप्रधान सेनापति क्षत्रीले ‘प्रविबन्धित’ नेकपाका नेता–कार्यकर्ता नियन्त्रणमा सेनालाई अघि नसार्न समेत सुझाव दिएका छन् । आफू अवकाश हुनुअघिसम्म सरकारलाई राजनीतिक समस्या वार्ताबाटै हल गर्न सुझाव दिएको र पहिलेको धारणा र सुझावमा त्यति तात्त्विक फरक नभएको उनले स्पष्ट पारे । ‘विप्लव र उनी संलग्न नेकपा राष्ट्रघाती र देशविरोधी होइनन्, उनीहरूमाथि राजनीतिक शक्तिकै व्यवहार गरिनुपर्छ,’ पूर्वप्रधान सेनापति क्षत्रीले भने– ‘समस्या सुल्झाउन राजनीतिक वार्ता र सहमति सबैभन्दा उपयुक्त विकल्प हो, वार्ताविनै बल प्रयोग गर्दा देश पुनः द्वन्द्वमा फस्ने जोखिम रहन्छ ।’
यतिबेला मुलुकको ठूलो समस्याका रूपमा बल्झिइरहेको राजनीतिक मामिलाबारे भर्खरै सेवानिवृत्त सेना प्रमुखको महत्त्वपूर्ण र अर्थपूर्ण अभिव्यक्तिसम्बन्धी यो खबर मातृका दाहालको बाइलाइनमा बिहीबारको नागरिक दैनिकमा प्रकाशित छ ।
