पाँचथरको मिक्लाजुङस्थित आरुबोटे हत्याकाण्डमा संलग्न रहेको आशंका गरिएका व्यक्तिले केही समयदेखि ‘सबैलाई मार्छु र आफू पनि मर्छु’ भन्ने गरेको अनुसन्धानबाट खुलेको छ ।
९ जनाको ज्यान जाने गरी ५ दिनअघि मिक्लाजुङ– ३, आरुबोटेमा भएको दुई परिवारको हत्यामा संलग्न भनिएका मानबहादुर माखिम झुन्डिएको अवस्थामा मृत फेला परेका थिए ।
‘घटनाको एक महिनाअघि म पनि मर्छु र सबैलाई मार्छु भनेर घरपरिवार र साथीभाइसँग भन्ने गरेको खुलेको छ’– अनुसन्धानमा संलग्न एक अधिकारीले भने । घटनाका दिन घरबाट उनी ‘उपचारका लागि विराटनगर जान्छु’ भनी कपडा बोकेर हिँडेको प्रहरीसँगको बयानमा परिवारले बताएको खबर माधव घिमिरे र लीलाबल्लभ घिमिरेको बाइलाइनमा शनिबारको कान्तिपुर दैनिकमा प्रकाशित छ ।
