बटेश्वर, धनुषाकी ९ कक्षामा पढ्ने एक ‘दलित’ किशोरी फागुन ११ गते साँझ बहिनीसँग खेतबाट घर फर्कंदै थिइन् । दिदीबहिनी आफ्नै सुरमा हिँडिरहेका थिए, अकस्मात् उनीहरुका अगाडि तीन जना चढेको मोटरसाइकल रोकियो । बहिनी डराएर घरतिर भाग्न सफल भइन् ।
‘मेरो नाकमा नशालु पदार्थ सुँघाएर बेहोस बनायो, आँखामा कालो पट्टी बाँधी अपहरण गर्यो,’ पीडित किशोरीले भनिन्– ‘हातखुट्टा डोरीले बाँधिदियो, एउटा सुई लगाइदियो, त्यसपछि के भयो थाहा छैन ।’
अनि त्यो समूहले उनलाई रातारात भारतको मझफ्फरपुर पुर्यायो । किशोरीलाई तीन महिनासम्म बन्धक बनाइयो र उनीमाथि सामूहिक बलात्कार भयो । किशोरीको हातखुट्टामा दाम्लाले बाँधिएको डाम छ, शरीरभरि पोलेका फोका छन्, कुटपटका नीलडाम छन् ।
फेरि अर्को एउटा अमानवीय हर्कतसम्बन्धी यो खबर राजकरण महतोको बाइलाइनमा बुधबारको अन्नपूर्ण पोस्ट दैनिकमा प्रकाशित छ ।
