अफगानिस्तानको पश्चिमी प्रान्त हेरातको मध्य भागमा रहेको एक जिल्लामा मङ्गलबार राति तालिबान विद्रोही समूहको आक्रमणमा परी कम्तिमा आठ सुरक्षा अधिकारीको मृत्यु हुनुका साथै १६ जना घाइते भएका छन् ।
प्रहरी स्रोतले बुधबार दिएको जानकारी अनुसार गोलरान जिल्लामा तालिबानहरुले मङ्गलबार राति गरेको सो आक्रमणमा परी आठ सुरक्षा अधिकारीको मृत्यु हुनुको साथै जिल्ला प्रहरी प्रमुखलगायत १६ जना घाइते भएका हुन् । प्रान्तीय प्रहरीका प्रवक्ता अब्दुल अहाद वालिजादाले सो कुराको पुष्टि गरेका छन् ।
आक्रमणपछि सुरक्षाबल र तालिबान लडाकुबीचको बुधबारसम्म पनि झडप जारी रहेको वालिजादाले बताएका छन् । तर, प्रहरी स्रोतले तालिबान लडाकुतर्फ कुनै क्षति भएको विवरण दिन सकेको छैन । तालिबान लडाकु समूहले पनि यस आक्रमण र त्यसपछिको झडपबारे कुनै टिप्पणी गरेका छैनन् ।
