सत्तारुढ नेकपाले ‘जनताको जनवाद’ लाई नै राजनीतिक कार्यदिशा बनाउने भएको छ । पार्टी अध्यक्ष एवं प्रधानमन्त्री केपी ओली यसमा सहमत देखिएका छन् ।
पार्टी सचिवालयको गत शनिबार बसेको बैठकमा राजनीतिक प्रतिवेदन प्रकाशन गर्नुपर्ने एजेन्डा छलफलमा आएपछि कार्यदिशाबारे विवाद देखिएको थियो । ‘जनताको जनवाद’ वा ‘जनताको बहुदलीय जनवाद (जबज)’ मध्ये कुन मान्ने भन्नेमा नेताहरू दुई धारमा बाँडिएका थिए ।
प्रधानमन्त्री ओलीले एकीकृत पार्टीको कार्यदिशा पुनर्लेखनको प्रस्ताव गर्दै जबजमा जोड दिएका थिए । तर, अर्का अध्यक्ष पुष्पकमल दाहाल ‘प्रचण्ड’ एकता प्रक्रियामा भएको सहमतिभन्दा दाया–बायाँ नगरी त्यसलाई कार्यान्वयन गर्नुपर्ने पक्षमा उभिएका थिए ।
पार्टी एकता गर्दा जबज र एक्काईसौं शताब्दीको जनवाद र माओवादलाई महाधिवेशनमा बहसमा लैजाने गरी स्थगन गरिएको थियो । तत्कालीन एमालेले जबज र तत्कालीन माओवादीले एक्काईसौं शताब्दीको जनवाद र माओवाद मान्दै आएका थिए ।
महाधिवेशनसम्म समाजवादउन्मूख हुने गरी ‘जनताको जनवाद’ लाई राजनीतिक कार्यक्रम बनाएर जाने सहमतिमा एमाले र माओवादीबीच एकता भएको खबर रामकृष्ण अधिकारीको बाइलाइनमा आइतबारको अन्नपूर्ण पोस्ट दैनिकमा प्रकाशित छ ।
