खाडी मुलुक कुवेतको आप्रवासी बस्ने एक अपार्टमेन्टमा आगलागी हुँदा तीन जना नेपालीको मृत्यु भएको छ । सो घटनामा सर्लाहीका विजय बैठासहित अरु दुई नेपाली महिलाको मृत्यु भएको कुवेतस्थित नेपाली दूतावासले जनाएको छ ।
शनिबार राति भएको आगलागीमा अप्सरा कामी र गौरी दर्जी नामका दुई महिलाको मृत्यु भए पनि नेपालमा उनीहरुको ठेगाना खुल्न नसकेको बताइएको छ । आगलागीबारेको खबर प्राप्त भए पनि घटनाका पीडित नेपालीबारे विस्तृत विवरण प्राप्त नभएको परराष्ट्र मन्त्रालयका प्रवक्ता भरतराज पौडेलले बताए ।
‘घटनामा एक पुरुष र दुई नेपाली महिलाको निधन भएको कुरा आएको छ, उनको विस्तृत घर ठेगाना खुल्न बाँकी छ, दूतावासमार्फत अन्य हताहातीबारे बुझ्ने काम भइरहेको छ’– उनले भने । आगलागीमा परी अन्य नागरिकको पनि ज्यान गएको बताइए पनि अरू नेपाली हुन् वा अन्यत्रैका हुन् भनेर प्रष्ट हुन बाँकी रहेको पौडेलले बताएको खबर सोमबारको नेपाल समाचारपत्र दैनिकमा प्रकाशित छ ।
