त्रिभुवन विश्वविद्यालय सेवा आयोग (त्रिवि सेवा आयोग) को परीक्षामा चरम अनियमितता गरेको आरोप लागेका उत्तरपुस्तिका परीक्षक रामबहादुर पाण्डेले ‘आत्महत्या’ गरेका छन् ।
आयोगका पूर्वकर्मचारी समेत रहेका ६७ वर्षीय पाण्डे बिहीबार साँझ त्रिपुरेश्वरस्थित एक भवनको ६ तलामाथिबाट हाम फालेको प्रहरीको प्रारम्भिक अनुसन्धानले देखाएको छ । उनी कानुन व्यवसायीलाई भेट्न उक्त भवनमा सञ्चालित ल फर्ममा पुगेका थिए । त्यही भवनबाट हामफालेर आत्महत्या गरेको हुन सक्ने महानगरीय प्रहरी कार्यालयका एसएसपी श्यामलाल ज्ञवालीले बताए ।
अख्तियारले उनीसहित १० जनाविरुद्ध परीक्षार्थीको नम्बर थपघट गरेर नतिजा फेरबदल गराएको आरोपमा विशेष अदालतमा भ्रष्टाचार मुद्दा दर्ता गराएको छ । सेवा आयोगको विज्ञापन नम्बर १८–०७३–०७४ अन्तर्गतको मुख्य कार्यालय सहायक पदको दोस्रो पत्र र कार्यालय सहायकको प्रथम पत्रको उत्तरपुस्तिका परीक्षणमा उनी संलग्न थिए ।
यी दुईसहित ६ पदको परीक्षामा आयोगका पदाधिकारी, परीक्षक, सम्परीक्षक र कर्मचारीले अनियमितता गरेको अख्तियारको ठहर छ । आयोगका अध्यक्ष चैतन्य शर्मा, सदस्य चिन्तामणि पोखरेल, सदस्यसचिव परशुराम कोइरालाविरुद्ध पनि मुद्दा दर्ता भएको खबर शनिबारको कान्तिपुर दैनिकमा प्रकाशित छ ।
