ताजकोट गाउँपालिका– २, कट्टेलगाउँकी शर्मिला जैसीको १६ वर्षकै उमेरमा विवाह भयो । ३५ वर्ष पुगिसकेकी उनले १२ सन्तान गर्भमा राखिन् । सात छोरीको जन्म दिएकी उनले ज्यान जोखिममा राखी पाँच पटक गर्भपतन गरिन् । जसको असरले अहिले उनको ज्यान कमजोर बनेको छ ।
सानै उमेरमा धेरै सन्तान जन्माउनु उनको रहर होइन, छोरा पाउनुपर्छ भन्ने पति र परिवारको दबाबले उनी इच्छाविपरीत बच्चा जन्माउन बाध्य भइन् । अहिले पनि उनी गर्भवती छिन् ।
उनकै गाउँकी दाना जैसीले पनि आठ सन्तान जम्माइन् । छोरा पाउने आसले उनले ३९ वर्षको उमेरमा आठ सन्तान जन्माएकी हुन् । धेरै सन्तान जन्माउँदा रगत बग्ने, ज्यान दुख्ने, खान मन नलाग्नेजस्ता समस्याले उनी पीडित छिन् । छोराको पर्खाइमा ज्यानको बाजी थापेर सन्तान जन्माउने शर्मिला र दाना जैसी गाउँका प्रतिनिधि आमा मात्र हुन् ।
आफ्नो वंश विस्तार हुने र मरेपछि दागबत्ती दिन छोरा नै हुनुपर्छ भन्ने परम्पराबाट ग्रसित पति, परिवार र समाजको दबाबमा हिमाली जिल्ला हुम्लाको गाउँका आमाहरु अहिले पनि इच्छाविपरीत धेरै छोरी जन्माउन बाध्य रहेको खबर गणेश विशुको बाइलाइन्मा बिहीबारको नागरिक दैनिकमा प्रकाशित छ ।
